.webp){kind=icon}
Откако ги надомести рекордните загуби и го отфрли токсичното партнерство, извршниот директор на „Рено“ (Renault), Лука де Мео, се подготвува за најголемиот потег досега во трансформацијата на францускиот производител на автомобили во производител на електрични автомобили.
Инвеститорите неделава ќе дознаат повеќе за планираната иницијална јавна понуда (IPO) во контекст на софтверот на „Рено“ и електричните автомобили, со амбициозно проценета вредност од осум до 10 милијарди евра. Де Мео на 15 ноември ќе им објасни како планира да ги надмине предизвиците на пазарот и да се израмни со другите учесници во пазарната конкуренција што треба да даде европски одговор за електричните возила на „Тесла“ (Tesla) и на конкурентите од Кина.
„Работиме напорно на ИПО, но јас не сум камикаѕе“, рече Де Мео во интервју за време на настан одржан во Париз минатата недела. „Немам планови да го ставам (бизнисот) на пазарот по намалена цена“.
Поранешниот извршен директор на „Ауди“ (Audi) и на „Фиат“ (Fiat) го водеше „Рено“ низ тешки времиња. Откако дојде во компанијата во 2020 година, тој го врати „Рено“ од пеколот во кој се најде компанијата, меѓу другото, поради државните заеми што ги зеде за да ги преживее пандемијата и изгубените милијарди по повлекувањето од Русија. Тоа беше проследено со месеци макотрпни преговори за прекин на 24-годишното партнерство со „Нисан“ (Nissan Motor).
Лука де Мео
Bloomberg Mercury
„Рено“, кој се подготвува да претстави уште едно евтино електрично возило неделава, планира да ја постави на пазарот електричната единица „ампере“ (Ampere) во април или мај следната година, но тој план е нарушен поради војната со цените предизвикана од „Тесла“ (Tesla) и несигурните ИПО-перформанси на компаниите „Арм“ (Arm Holdings) и „Биркенсток“ (Birkenstock). Опциите на производителите на автомобили на масовниот пазар, фокусирани на Европа, се намалуваат во услови на скапа транзиција кон производство на електрични автомобили.
„Лука (Де Мео) го има патоказот, тој му даде насока на 'Рено', а квалитетот на возилата на компанијата деновиве е извонреден“, вели Пјер-Оливие Есиг, аналитичар во АИР (AIR Capital) во Женева. „ИПО можеби не е добра идеја во моментов, со оглед на состојбата на пазарот, но мислам дека (Де Мео) на крајот ќе успее“.
Откако компанијата застрани од патот поради проблематичното партнерство со „Нисан“ и ненадејното заминување на поранешниот шеф на алијансата Карлос Госн, „Рено“ мора да забрза за да ги достигне ривалите како „Стелантис“, компанија формирана со спојување на француската групација ПСА (PSA) и „Фиат Крајслер“ (Fiat Chrysler). Гигантот на Карлос Таварес, кој вклучува 14 бренда, сега е над „Рено“, особено откако пропадна планот на „Рено“ за спојување со „Фиат“.
Во моментов има голем притисок производителите на автомобили да се префрлат на електрични возила. Годинава групацијата го загуби својот удел на пазарот за електрични возила во заедницата на 28 европски земји поради постепеното повлекување од пазарот на моделот „зои“ (Zoe), најпродаваното возило во првиот бран на манијата за електрични модели, според податоците од „Џато динамикс“ (Jato Dynamics).
Продажбата на „меган и-тек“ (Megane e-Tech), за кој „Рено“ се надеваше дека може да биде ривал на „тесла модел 3“ (Tesla Model 3), е забавена на околу 35.000 возила до крајот на септември, што е многу помалку од првичната цел од повеќе од 100.000 автомобили годишно, а ИПО на „ампере“ веќе еднаш беше одложена.
ИПО ќе му овозможи на „ампере“ да го забрза спроведувањето на својот амбициозен развоен план во време кога брзината на иновациите е најважна. Покрај моделот „меган и-тек“, „Рено“ до 2030 година ќе има уште пет електрични возила, вклучувајќи ги „сеник“ (Scenic) и новиот „рено 5“ (Renault 5).
„На групацијата ѝ се потребни нови производи за да се натпреварува со 'Фолксваген груп' (VW Group), која денес има 15 модели на располагање, и 'Стелантис', која нуди 23 модели, вклучувајќи комбиња“, вели Фелипе Муњоз, глобален аналитичар во „Џато динамикс“.
Де Мео има и други опции за финансирање: „Рено“ има готовина и би можел да продаде дел или сите акции на „Нисан“, кои моментално вредат 4,8 милијарди долари, иако секој таков потег би бил направен по детален договор со партнерската компанија.
Со продажба на акциите, тој сака да привлече нови инвеститори, а би можел да ги понуди малку под вкупната вредност од околу осум милијарди евра, велат двајца извори запознаени со ситуацијата, кои побарале да останат анонимни бидејќи станува збор за внатрешни работи.
„'Ампере' е долгорочен проект и неговото ИПО е само едно парче од сложувалката“, рече Де Мео.
Загриженоста дека Де Мео премногу компликува додека се обидува да го надмине лошиот почеток со скапиот „меган и-тек“ фрли сенка врз ИПО.
„Лесно е да се каже дека ИПО на 'ампере' нема да мине бидејќи не се продадени доволно автомобили 'меган и-тек'“, рече тој. „Никогаш не требаше да биде автомобил за масовна продажба, а претходните години продадовме илјадници 'дачија спринг' (Dacia Spring) и 'зои' (Zoe EV)“.
Во срцето на ИПО на „Рено“ ќе бидат неговите софтверски способности, кои компанијата ги оценува како супериорни откако собра повеќе од 400 софтверски инженери на „Интел“ во 2017 година. Тимот помогна да се придобијат партнери како „Куалком“ (Qualcomm) и „Гугл“ (Google) на „Алфабет“ (Alphabet) и му помогна на производителот на автомобили да избегне некои софтверски стапици во кои паднаа неговите поголеми ривали, вели Де Мео.
Франција, клучен акционер во компанијата со удел од 15 отсто, ја гледа логиката во одвојувањето на бизнисот со електрични возила и создавањето јавна компанија.
„Новата единица за електрични возила ќе помогне да се развие нова култура“, рече Алексис Зајденвебер, претставник на француската влада во бордот на „Рено“. Новата единица ќе биде „поблиску до технолошкиот екосистем и иновативниот начин на размислување што му прилега на водечки производител на електрични возила“.
