.webp){kind=icon}
Групацијата „Леново“ во вториот квартал оствари приходи од 14,4 милијарди американски долари и нето-добивка од 273 милиони.
Бруто-профитната маржа се подобри на годишна основа на 17,5 отсто, што е рекордно високо ниво за вториот квартал, се посочува во соопштението на компанијата од петокот.
„Диверзифицираните двигатели на растот на групацијата продолжија да обезбедуваат силни перформанси, така што приходите од деловните активности што не вклучуваат персонални компјутери сочинуваат 40 отсто од приходите на групацијата, што е за три поени повеќе во споредба со истиот период минатата година“, се наведува во соопштението.
Тие нагласуваат дека гледаат јасни знаци на закрепнување во технолошкиот сектор и се уверени во нивната способност да продолжат да растат од година на година. Одборот на директори на компанијата изгласа привремена дивиденда.
„Минатиот квартал, и покрај макропредизвиците, видовме јасни знаци на закрепнување во технолошкиот сектор. Благодарение на нашето силно извршување, оперативната извонредност и континуираното инвестирање во иновациите, испорачавме последователни квартални подобрувања во перформансите, што укажува на охрабрувачка траекторија за закрепнување Со продолжување на извршувањето на нашата интелигентна стратегија за трансформација и со нашиот екосистем за вештачка интелигенција и дополнително зајакнување на партнерството, ќе ги искористиме нашите сеопфатни способности за вештачка интелигенција за да испорачаме хибридни апликации за вештачка интелигенција за секоја компанија и секој поединец, што на крајот ќе го поттикне одржливиот раст на нашиот бизнис“, изјави Јуанкинг Јанг, претседател и извршен директор на компанијата.
Инаку, пазарната вредност на „Леново“, еден од најголемите светски производители на персонални компјутери, е 62 милијарди долари, а вработува 77.000 луѓе и работи на 180 пазари низ светот.
