Илон Маск нагласи дека повеќе би сакал да произведува производи со вештачка интелигенција (ВИ) надвор од „Тесла“ (Tesla Inc.) ако не добие 25 отсто од контролата врз гласањето, што сугерира дека сака поголем удел во највредниот производител на електрични возила во светот.
Маск, најголемиот поединечен акционер на „Тесла“ со повеќе од 12 отсто од компанијата, одговори на објава на социјалните мрежи зошто му треба уште еден голем пакет за компензација за да остане мотивиран. Тој рече дека причината поради која не е воспоставен новиот план е тоа што компанијата сè уште ја чека пресудата во тужбата на акционерите против претходниот пакет од 55 милијарди долари, што беше сума без преседан во тоа време.
Во објава на X, Маск тврди дека автомобилската компанија е збир од десетина стартапи. Тој повика на споредба меѓу „Тесла“ и „Џенерал моторс“ (General Motors Corp.), еден од светските лидери во автомобилската индустрија. „Тесла“, на пример, го развива роботот оптимус (Optimus), а минатиот месец објави видео што покажува подобрувања на хуманоидниот прототип.
Производителот на автомобили исто така инвестира повеќе од милијарда долари во својот проект за суперкомпјутер наречен доџо (Dojo), кој ќе ги обучува моделите за машинско учење што стојат зад системот за самоуправување на возилата. Аналитичарите проценуваат дека тоа би можело да додаде 500 милијарди долари на вредноста на „Тесла“.
На настанот „Ден на вештачката интелигенција“ (AI Day) во 2021 година, Маск рече дека сака да покаже дека компанијата е повеќе од само производител на електрични автомобили, туку дека е „веројатно и лидер во реалната вештачка интелигенција“.
„Непријатно ми е да ја развивам 'Тесла' како лидер во вештачката интелигенција и роботиката без ~ 25 отсто гласачка контрола“, објави на X извршниот директор. „Ако имам 25 отсто, тоа значи дека сум влијателен, но може да бидам и заобиколен ако двојно повеќе акционери гласаат против мене. На 15 отсто или помалку, односот за/против олеснува да се преземаат дејства поради сомнителни интереси“.
Маск рече дека мисли дека е добро да се има структура за гласање во две класи за да се постигне тоа, „но ми беше кажано дека тоа е невозможно да се постигне пост-ИПО (англ. IPO-Initial public offering)“.
По повеќе од двоен раст во 2023 година, акциите на „Тесла“ паднаа за 12 отсто годинава, со што се избришаа повеќе од 94 милијарди долари пазарна вредност.
Најбогатиот човек во светот се бори со незадоволството на акционерите поради низа прашања.
Компанијата исто така беше погодена од голем број негативни вести, вклучувајќи ги и пресвртот во однос на електричните возила во гигантот за изнајмување автомобили „Херц“ (Hertz Global Holdings Inc.), уште едно намалување на цените во Кина и знаците за зголемување на трошоците за работна сила.
„Што е 'Тесла'? Компанија за автомобили, енергија или вештачка интелигенција?“, вели Даниел Колар, раководител на секторот за автомобили и мобилност во консултантската фирма „Интралинк“ (Intralink). „Ако тоа не е компанија со вештачка интелигенција, тогаш не гледам проблем за основање нова компанија. Покрај тоа, не ми се верува дека неговото однесување или начин на обраќање може да биде од корист за некоја од неговите компании во моментов“.
.webp){kind=icon}
