„Гугл“ на „Алфабет“ (Alphabet Inc.) отпушти 28 вработени поради нивна вклученост во протестите против проектот „Нимбус“ (Project Nimbus), заеднички договор вреден 1,2 милијарда долари со „Амазон“ (Amazon.com) за да ѝ се обезбедат на израелската влада услуги за вештачка интелигенција и облак.
Протестите, кои беа предводени од организацијата „Нема технологија за апартхејдот“ (No Tech for Apartheid), се одржаа во вторникот низ канцелариите на „Гугл“ во Њујорк, Сиетл и Санивејл, Калифорнија. Демонстрантите во Њујорк и Калифорнија организираа речиси 10-часовно седење, а други ја документираа акцијата, вклучувајќи и преку пренос во живо на Твич (Twitch). Деветмина од нив беа уапсени во вторникот вечер под обвинение за прекршок.
Неколку работници вклучени во протестите, вклучувајќи ги и оние што не биле директно инволвирани, добиле порака од групата за односи со вработените во компанијата, со која биле информирани дека се пуштени на одмор. „Гугл“ им посочил на засегнатите вработени дека „го чува прашањето колку што е можно подоверливо и открива исклучиво информации што мора да се знаат“ во електронска порака во која „Блумберг“ имал увид. Во средата вечер работниците биле известени дека се отпуштени од компанијата, се наведува во изјавата на персоналот на „Гугл“ поврзан со кампањата „Нема технологија за апартхејдот“.
„Физичкото попречување на работата на другите вработени и спречувањето на нивниот пристап до деловните објекти е јасно прекршување на нашите политики и целосно неприфатливо однесување“, се наведува во соопштението на „Гугл“ за демонстрантите. „По одбивањето на повеќе барања да се напуштат просториите, органите на прогонот беа ангажирани да ги отстранат за да се осигури безбедноста на канцелариите. Досега имаме спроведено поединечни истраги, кои резултираа со престанок на работниот однос на 28 вработени, и ќе продолжиме да истражуваме и да преземаме активности по потреба“.
„Гугл“ долго време ја фаворизира културата на отворена дебата, но активизмот на вработените во последниве години ја тестираше таа посветеност. Работниците што организираа колективно заминување во 2018 година поради начинот на кој компанијата се справила со обвинувањата за сексуален напад рекоа дека „Гугл“ ги казнил за нивниот активизам. Четворица други работници тврдеа дека биле отпуштени поради организирање отпор против соработката на „Гугл“ со федералната царинска и гранична управа и за застапување други агенди на работното место.
.webp){kind=icon}