На косовско-македонската граница поминуваат поштенски пратки без царина во необележани возила, како договорна соработка на приватни поштенски оператори, беше изнесено денеска на јавен состанок на Агенцијата за пошти, од каде што веќе алармирале до Министерството за внатрешни работи и до Царината.
„Најчесто моделот на работа е така што македонска и косовска пошта склучуваат договор за соработка и има циркулација на пратките преку граница. Постапката е сосема легална, но прашањето е дали поминуваат на царина, дали плаќаат царински давачки и дали Царината воопшти забележала дека секојдневно приватни возила, обележани и необележани, ја поминуваат границата. Соработуваме и со МВР и со Царината и апелирале дека проблемот треба да се реши подлабоко“, рече Олга Манчевска, раководителка на Директоратот за регулатива, лиценцирање и правни работи во Агенцијата за пошта.
МИА
Пазарот на пакети со удел од над 99 проценти го држат операторите на слободниот пазар, а кај сите лиценцирани компании што обезбедуваат домашни услуги, најголем процент за жал се услугите за пакети со откупнина, проблем на кој Агенцијата за пошта укажува подолго време.
„Циркулирањето на кешот низ поштенските мрежи создава проблеми затоа што таму има можности за сива економија, а и самите поштенски оператори трпат заради таа готовина во кеш бидејќи сè почести се кражбите и поголеми се ризиците и по животот и по телото. Потребна е работа од сите чинители на пазарот, државните институции, а особено внимание да посветат е-трговците да ја развијат е-трговијата на нивото на кое очекуваме, а не вака да купуваме од продавници на Фејсбук и на Инстаграм, со што ќе може да се искоренат овие практики, кои се непознати за европските економии“, наведе Манчевска.
Најголем обем од услугите за мали пакети со нарачки од Кина и натаму ќе се остварува низ мрежата на АД „Пошта“, меѓу другото поради несомнено поповолните капацитети за вршење на царинските формалности при увоз на поштенски пратки.
Бројот на даватели на слободниот пазар не е променет од пред шест месеци и изнесува 34, од кои 22 имаат лиценца за работа на целата територија на државата, но не се сите активни. Кај поразвиените од нив, се зголемува интересот да вршат и меѓународни поштенски услуги.
Статистиките на Агенцијата за пошта покажуваат постојан раст на обемот кај давателите на слободниот пазар, кој минатата година изнесувал 32,7 проценти во однос на претходната година, и силно позиционирање на услугата пакети, со зголемување од 26,7 проценти во однос на 2022 година.
Лани бил зголемен обемот на пакети кај „Пошта на РСМ“ за 14 проценти, но и покрај тоа е многу мал во однос на вкупно обезбедените пакетски услуги на пазарот, кои кај приватните оператори изнесуваат седум милиони и имаат раст од 32,7 проценти. Обемот на поштенскиот пазар лани бележеше годишен раст од 6,37 проценти, а поштенските пратки по жител изнесуваа 20,9. Минатата година бројот на рекламации кај приватните поштенски оператори беше зголемен за 45,9 проценти.
.webp){kind=icon}