„Стандард и Пурс“ го потврди кредитниот рејтинг на земјава, но предупредува за сивата економија

Агенцијата за кредитен рејтинг „Стандард и Пурс“ (Standard&Poor’s) го потврди кредитниот рејтинг на Македонија ББ- со стабилни изгледи. Девизните резерви бележат раст, инфлацијата забавува, додека стабилноста на банкарскиот сектор и натаму зајакнува, пишува во извештајот за кредитниот рејтинг на земјава.

Агенцијата посочува дека и покрај скорешните кризи, банкарскиот сектор е зајакнат, што се гледа и од историски високата стапка на адекватност на капиталот од 19 проценти во третиот квартал од 2024 година и ниска стапка од 2,9 проценти на нефункционалните кредити на крајот на ноември 2024 година.

„Народната банка продолжува со мерки за зајакнувањето на финансиската стабилност, преку зголемување стапката на противцикличниот слој на капиталот и интервенции кај задолжителната резерва во девизи“, пишува во извештајот на „Стандард и Пурс“.

Од Министерството за финансии потенцираат дека агенцијата ја нотира определбата на Владата за сеопфатни реформи со цел забрзување на економскиот раст, зајакнување на административните капацитети, борба против корупцијата и зајакнување на владеењето на правото.

Во извештајот на „Стандард и Пурс“ се наведува дека слабата надворешна побарувачка и ограничена инвестициска активност го ограничија растот на економијата на 2,6 проценти во трите квартали од 2024 година (не вклучувајќи го последното тримесечје). Агенцијата очекува подобрување во 2025 година со раст на економијата од 2,9 проценти и стабилизирање на економскиот раст на ниво од околу три отсто до 2027 година, поттикнат главно од постепеното закрепнување на надворешната побарувачка и порастот на инвестициската активност.

Агенцијата очекува стапката на инфлација да остане на ниво од околу 3,5 проценти, најмногу како резултат на растот на цените на храната.

Агенцијата смета дека спроведување на структурните реформи може да донесат значителен напредок за земјата, поддржан од подобрите фискални перформанси, намалувањето на долгот и силниот економски раст.

Во извештајот „Стандард и Пурс“ наведуваат дека главен приоритет на Владата е стимулирање на економскиот раст и постигнување стапки на раст до пет отсто преку реализација на големи инфрастуктурни проекти. Агецијата посочува и дека се вложуваат напори за зајакнување на инвестициите, подобра наплата на даноците,  како и зголемување на пензиите и платите за поддршка на граѓаните. Притоа, посочуваат на потребата од спроведување засилена фискална консолидација.

Со буџетот за 2025 година, како што стои во извештајот, дефицитот е проектиран на четири отсто од БДП. Приходите се очекува да се зголемат за 13 проценти, достигнувајќи 35,7 отсто од БДП, поттикнати од поголемата наплата на даноци и придонеси за социјално осигурување, како и повисоки стапки на економски раст. Расходите ќе забележат раст од 10,3 отсто, што изнесува 40 проценти од БДП, пред сè заради повисоките плати во јавниот сектор и социјалните трансфери, повеќе средства за здравствена заштита, како и за капитални инвестиции, кои се планирани на ниво од 47,2 милијарди денари или 4,2 отсто од БДП.

Како ризик фактори, кои би претставувале притисок врз остварување на проектираниот буџетски дефицит, според „Стандард и пурс“, може да бидат осварувањето на пониски стапки на раст од проектираното, помалата наплата на даноците, сивата економијата, како и зголемување на трошоците за инвестициите.

„Стандард и пурс“ го оценува кредитниот рејтинг на земјата два пати во годината, а го покажува степенот на ризик од инвестирање. Според тоа, извештајот од релевантните меѓународни рејтинг агенции, како „Стандард и Пурс“ или „Фич“ (Fitch), претставува клучен и релевантен рејтинг фактор за потенцијалните инвеститори при носењето одлуки за инвестирање.

Текстот е обновен со додавање на вториот и третиот пасус.

Во моментов нема коментари за веста. Биди прв да коментира...

Остави коментар