text size
Aмерикански федерален судија утврди дека „Гугл“ (Google) незаконски ја користел својата доминантна позиција на пазарот преку својот интернет пребарувач за да ја победи конкуренцијата и да ги задуши иновациите. Според судската одлука, компанијата го монополизирала пазарот за пребарување преку склучување ексклузивни зделки.
Иако е речиси сигурно дека технолошкиот гигант ќе се жали на одлуката и дека спорот ќе стигне до Врховниот суд на САД, АП оценува дека одлуката е од сеизмичка природа и дека може да го промени интернетот каков што го знаеме и ја попречува една од најпознатите компании во светот.
Долгоочекуваната одлука на судијата Амит Мехта доаѓа речиси една година по почетокот на судењето меѓу „Гугл“ и американското Министерство за правда. Тоа е најголемиот антимонополски случај што е воден во таа земја во последните 25 години.
Bloomberg
Мехта истакна дека „Гугл“ нема монопол на пазарот за општо рекламирање за пребарување, истакнувајќи дека конкурентите како „Амазон“ (Amazon.com), „Волмарт“ (Walmart) и други трговци на мало почнале да нудат реклами поврзани со пребарување на нивните веб-страници. Но, „Гугл“ има монопол на текстуалните огласи при пребарување, кои се појавуваат на врвот на страниците со резултати од пребарувањето за да ги привлечат корисниците да ги посетат тие страници, рече тој.
„Внимателно разгледувајќи ги и одмерувајќи ги сведочењата на сведоците и доказите, судот дојде до следниот заклучок - 'Гугл' е монопол и работи на одржување на својот монопол“, напиша меѓу другото Мехта во објаснувањето на 286 страници.
Тој рече дека одделот на „Алфабет“ платил 26 милијарди долари за да го направи својот прелистувач стандардна опција, што практично го блокира секој друг конкурент да успее на пазарот.
„Договорите за дистрибуција на 'Гугл' задржуваат значителен дел од пазарот на општи услуги за пребарување и ја загрозуваат способноста на конкурентите да се натпреваруваат“, рече Мехта. Со монополизирање компанијата успеа да ги покачи цените на онлајн огласувањето без последици, нагласи тој.
„Оваа победа против 'Гугл' е историска победа за американскиот народ“, рече државниот обвинител Мерик Гарланд. „Ниту една компанија - без разлика колку е голема или моќна - не е над законот. Министерството за правда ќе продолжи енергично да ги спроведува антимонополските закони“.
„Гугл“ соопшти дека планира да поднесе жалба на пресудата. „Како што продолжува овој процес, ние ќе останеме фокусирани на создавање производи што луѓето ги сметаат за корисни и лесни за користење“, рече Кент Вокер, претседател за јавни работи на „Гугл“.
Министерството за правда сè уште не соопштува какви мерки ќе бара против компанијата.
.webp){kind=icon}
