„Гугл“ ја победи ЕУ по обвинението за монопол во онлајн рекламирањето

„Гугл“ ја доби судската битка со Европската Унија (ЕУ), водена поради казната од 1,5 милијарда евра и обвинувањата дека ја спречува конкуренцијата во секторот на онлајн рекламирањето. Со тоа компанијата делумно го надомести поразот од минатата недела, кој го претрпе во посебна пресуда, поврзана со злоупотреба на монополските овластувања.

Судиите на Општиот суд на ЕУ во Луксембург ја поддржаа жалбата на единицата под капата на „Алфабет“ - на паричната казна изречена во 2019 година, велејќи дека регулаторите направиле грешки во нивната истрага. Европската комисија (ЕК) изјави дека „Гугл“ - како доминантен посредник за рекламирање на интернет - незаконски ги спречувал ривалите како „Јаху“ и „Мајкрософт“ да поставуваат реклами на веб-страници на трети страни.

На пресудата од средата сè уште може да се поднесе жалба до највисокиот суд на блокот, Судот на правдата, а одлуката доаѓа по два судски успеха на шефицата на антимонополските институции Маргрете Вестагер и нејзините обиди да го ограничи влијанието на Силициумската Долина.

Таа минатата недела го победи „Гугл“ на највисокиот суд - поради обидот да избегне антимонополска казна од 2,4 милијарди евра и фаворизирање на резултатите од сопствените производи во доменот на пребарувањето, а исто така го победи и „Епл“, кој се обиде да избегне ирски данок од 13 милијарди евра.

Случајот поврзан со сервисот Гугл адсенс (Google AdSense) е последниот во серијата судски спорови што се водат за време на мандатот на Маргрете Вестагер, а кои треба да бидат завршени по десет години. Регулаторите на ЕУ се фокусираа на улогата на „Гугл“ како посредник за реклами на веб-страници, каде што производот Адсенс (AdSense for Search) поставува реклами на платформи, вклучувајќи страници на весници, блогови и туристички веб-страници.

Кога бриселскиот регулаторен орган го казни „Гугл“ со 1,49 милијарда евра во 2019 година, беше наведено дека договорите на компанијата спречувале страниците (со кои соработува) да прифаќаат реклами од ривалите на интернет, како што се „Мајкрософт“ и „Јаху“. Кога корисникот би внел пребарување, рекламите на ривалите би биле блокирани. Сите проблематични договори беа отфрлени до 2016 година, кога ЕУ крена прашина за својата истрага.

Грешки на ЕУ

И покрај потврдувањето на повеќето образложенија на ЕУ, судиите во пресудата од средата рекоа дека регулаторите направиле грешки во процената на траењето на спорните клаузули, како и за делот од пазарот што тие го покривале за време на 2016 година.

Европската комисија „не утврди дека сите три клаузули што ги идентификува претставуваат злоупотреба на доминантната позиција и, севкупно, поединечно и континуирано прекршување“ на антимонополските правила, наведува судот.

На сослушувањето во Општиот суд на ЕУ во 2022 година, адвокатите на „Гугл“ рекоа дека казната на ЕУ од 2019 година претставува „квазикривична мерка од огромни размери“.

Случаите против „Гугл“, кои ги следи ЕУ, ја истакнаа суштината на напорите на Маргрете Вестагер да се справи со растечката моќ на големите технолошки компании. Таа досега ја казни компанијата ќерка на „Алфабет“ со повеќе од осум милијарди евра, а отвори и четврти случај поврзан со деловните активности на „Гугл“ и технологијата за рекламирање. Се чека конечната одлука од таа истрага.