По подемот на ракетата, тешко приземјување: Дали вреди сега да се купат акции на „Тесла“?

Акциите на „Тесла“ (Tesla) во последната половина година танцуваа диво танго - нивното движење е слично на движењето на една од криптовалутите. По изборот на Трамп на почетокот на ноември, акциите на „Тесла“ пукаа во стратосферата како ракета на „Спејс екс“ (Space X). Нешто повеќе од еден месец по изборите го достигнаа врвот на нешто помалку од 480 долари. Во тоа време пазарната капитализација на компанијата достигна 1,54 трилион долари, износ многу поголем отколку на 16-те најголеми производители на автомобили заедно. Од американските избори до средината на декември акциите пораснаа за над 90 отсто, но потоа се преполовија.

Може ли Маск да ја спаси „Тесла“?

Акциите благо закрепнаа до почетокот на април, но потоа повторно паднаа на 222 долара поради воведувањето на царините на Трамп. Во последниве месеци дивото движење, исто така, доведе до бојкоти и неколку напади врз салоните на „Тесла“ во САД и во Европа како одговор на мешањето на извршниот директор Илон Маск во американската политика и изборните кампањи во европските земји. Акциите на „Тесла“ паднаа за околу половина од својот врв достигнат во средината на декември. Во вторникот оваа акција го затвори тргувањето по цена од 238 долари. Дали конечно дојде вистинското време да купите акции?

 

 

По многубројните повици од инвеститори и аналитичари, по објавувањето на деловните резултати од првиот квартал Маск објави дека сега ќе посвети повеќе од своето време на водење на „Тесла“, а помалку на Одделот за владина ефикасност (DOGE). „Во ’Тесла’ поминавме многу кризи низ годините... Не сме на работ на смртта, не сме ни блиску“, рече Маск во своето обраќање до инвеститорите.

 

 

„Сите знаеме за што е способен Илон Маск и што направил досега. Улогата во владината агенција DOGE секако одзеде многу од неговото време, што се одрази и на цената на акциите на ’Тесла’“, напиша Дејвид Зорман, директор за ЕСГ-анализа и менаџер на средства во „Џенерали инвестментс“ (Generali Investments). „Сега тој треба да работи за DOGE само еден или два дена неделно и да се врати во ’Тесла’, каде што има имот од околу 100 милијарди долари“. Тој додава дека акциите на „Тесла“ се движат околу својата сегашна вредност во последните четири години.

Зорман смета дека индустријата за електрични возила (ЕВ) во моментов е во многу тешка ситуација. Тој ги споменува силната конкуренција од Кина, помалите субвенции, заситеноста на пазарот и недостигот од инфраструктура за полнење. „Во ’Тесла’ ова покрива помал дел од вредноста на компанијата, а голем дел сè уште се идни производи. Дали плановите ќе се остварат, се разбира, ќе видиме, вреднувањето на акциите на ’Тесла’ не е баш ниско, но никогаш и не било. Во споредба со остатокот од седумте величествени (Magnificent Seven), цената на акцијата на ’Тесла’ е сè уште повисока од таа на другите компании во последните шест месеци“.

Што велат аналитичарите?

Процентот на аналитичари што советуваат да се купат акции на „Тесла“ се зголемува од крајот на февруари. Според последните податоци, уделот пораснал на 54 отсто или 33 аналитичари. Нешто помалку од една четвртина од аналитичарите советуваат инвеститорите да ги задржат акциите во своето портфолио, додека петтина (21,3 отсто од аналитичарите) препорачуваат продажба на акциите. Акцијата во моментов е под целната годишна цена. Сегашната разлика помеѓу 12-месечната цел и моменталната вредност е 65 долари.

 

 

Тримесечје за заборав

Во првиот квартал годинава „Тесла“ ги забележа своите најлоши оперативни резултати во последните години. Како што вели Зорман, резултатите биле разочарувачки. „Акцијата по објавувањето забележа раст од околу седум отсто бидејќи некои од ветувањата ги задоволија инвеститорите. Многу се очекува од лансирањето роботакси во јуни. Анализите покажуваат дека тоа би било побезбедно и исто така поевтино од такси-возилата какви што ги знаеме денес“, напиша Зорман.

 

 

Приходите на компанијата пораснаа за девет отсто, главно поради високиот раст на приходите во одделот за соларни ќелии и батерии. Приходите во автомобилскиот оддел паднаа за 20 отсто. Заработката пред камати, даноци и амортизација (ЕБИТДА) падна за 17 отсто. Оперативната маржа се намали за 3,4 процентни поени, на само 2,1 отсто. Профитот падна за 71 отсто, на 409 милиони долари. На почетокот на месецот компанијата објави дека производството паднало за 16 отсто, а испораките за 13 проценти.

Како протекоа 770 милијарди долари

Високата вредност на акцијата се засноваше на очекувањата за идниот раст (на пример, автономни возила и проширување на инфраструктурата) и зависеше од успехот на овие проекти, ни објасни на почетокот на годината Алеш Грбич, менаџер на заеднички фондови во „Сава инфонд“.

Во втората половина на минатиот декември заврши ракетното искачување. Акциите паднаа натежнати од веста дека продажбата на европскиот пазар во ноември падна за 40 отсто, многу повеќе од падот од 9,5 отсто на генералната продажба на ЕВ. Во меѓувреме, „Тесла“ повлече речиси 700.000 возила во САД поради проблем со системот за следење на притисокот во гумите. Повлекувањата поврзани со софтверот не се толку голем проблем за „Тесла“ бидејќи компанијата врши далечински ажурирања.

Веднаш по новата година следуваа нови, помалку охрабрувачки вести. Податоците за производството и испораките на автомобили беа разочарувачки, потфрлајќи ги очекувањата на аналитичарите. Ова беше прв пад на годишно ниво на бројот на испораки. Во меѓувреме возило на „Тесла“ експлодира пред хотелот на Трамп во Лас Вегас. По јануари, кога движењето на акциите донекаде се смири, следуваше уште поголем пад. Најниската вредност акцијата на оваа компанија ја достигна во почетокот на март, кога падна на 222 долара.

Во моментов нема коментари за веста. Биди прв да коментира...

Остави коментар