Канадската влада го прекинува штрајкот - „Ер Канада“ од вечерва ќе продолжи да лета

„Ер Канада“ попладнево ќе продолжи со работа откако владата презеде мерки за прекин на штрајкот на повеќе од 10.000 членови на кабинскиот персонал, што доведе до стотици откажани летови.

Летовите ќе продолжат во недела навечер со постепено зголемување во текот на наредните денови, соопшти авиокомпанијата со седиште во Монтреал. Сепак, се очекува да поминат неколку дена пред работењето комплетно да се врати во нормала.

Канадскиот одбор за индустриски односи ѝ наложи на „Ер Канада“ да продолжи со операциите на авиокомпаниите и сите стјуарди и стјуардеси на „Ер Канада“ и „Ер Канада Руж“ да се вратат на работа до 14:00 часот по локално време во Монтреал, пишува во соопштението испратено денеска. Овој потег дојде откако министерката за труд Пати Хајду му наложи на независниот синдикат да нареди продолжување на работењето и да воведе обврзувачка арбитража за решавање на застојот околу преговорите за договор.

Околу 10.500 стјуардеси ја напуштија работата рано во саботата и влегоа во официјален штрајк откако преговорите за плати меѓу синдикатот и најголемата авиокомпанија во земјата не успеаја. Резултатот од таквата акција е што „Ер Канада“ приземји стотина авиони и откажа стотици летови, што предизвика нарушување на плановите на околу 130.000 патници дневно за време на летната сезона, како и огромни финансиски загуби за авиокомпанијата.

Повеќе на овој линк: Почна штрајкот на „Ер Канада“, приземјени се стотина авиони