Шести експерт за вештачка интелигенција на „Епл“ заминува во „Мета“

„Мета“ (Meta Platforms Inc.) го ангажира Франк Чу, директорот за вештачка интелигенција (ВИ) од „Епл“ (Apple Inc.), за да ѝ се приклучи на МСЛ (Meta Superintelligence Labs), според лица упатени во ситуацијата.

Чу е најновиот вработен од „Епл“ што работел на ВИ-модели и преминува во „Мета“, приклучувајќи им се на неколку колеги, вклучувајќи го и шефот на тимот за ВИ-модели во „Епл“.

„Мета“ го забавува вработувањето, а во еден интерен допис се наведува дека компанијата „привремено паузира со вработување во сите МСЛ-тимови, освен за критични позиции за бизнисот“, пишува во документ до кој дошол „Блумберг“.

Чу ги предводеше тимовите за вештачка интелигенција на „Епл“ што биле фокусирани на инфраструктура во облак, тренирање и пребарување, а ќе ѝ се приклучи на МСЛ. Портпаролите на „Епл“ и на „Мета“ одбија да коментираат.

Тој следи неколкуте свои колеги во „Мета“, која исто така го вработи и шефот на тимот за ВИ-модели во „Епл“. Чу помагал во управувањето со големите јазични модели на облак-серверите на „Епл“, надгледувал дел од обуката на софтверот и учествувал во развојот на функции за пребарување за Сири и забавните сервиси.

Чу е најмалку шести експерт за ВИ-модели од „Епл“ што премина во „Мета“. Бранoт на заминувања започна во јули, кога Руоминг Панг, творецот на ВИ-тимот на „Епл“, ја напушти компанијата поради пакет вреден 200 милиони долари во „Мета“.

Потоа, „Епл“ го напуштија и ВИ-инженерите Том Гунтер, Марк Ли, Боуен Жанг и Јун Жу. Покрај Панг, Чу е најзначајното заминување, имајќи ги предвид обемот на неговите одговорности и позицијата во компанијата. Тој беше заменик на Беноа Дупин, извршниот директор за ВИ-инфраструктура во „Епл“, кој одговара на Џон Џанандреа, шефот за ВИ-стратегијата на „Епл“.

Чу ќе работи во новиот тим на „Мета“, наречен „МСЛ Инфра“ (MSL Infra), кој ќе се занимава со развој на ВИ-инфраструктура. Неделава „Мета“ го реорганизираше ВИ-одделот во четири сектори, кои сега се подредени на поранешниот шеф на „Скејл еј-ај“ (Scale AI), Александар Ванг. „Мета“ го забавува вработувањето по неколкуте месеци во кои потроши милијарди долари за зајакнување на групата „Суперинтелиџенс“ (Superintelligence).

„За да управуваме одговорно со бројот на вработени и да осигуриме дека отворените и идните позиции се усогласени со нашите приоритети, привремено паузираме со вработување во сите МСЛ-тимови, освен за важни позиции“, се наведува во интерниот допис до менаџерите за вработување во кој увид имал „Блумберг“.

За „Епл“, овој бран на заминувања носи дополнителни потреси во ВИ-одделот, кој веќе се соочува со тешкотии. Компанијата заостанува зад конкуренцијата и ја одложи значајната надградба на Сири.

По промените во раководството, „Епл“ сега разгледува употреба на ВИ-модели од трети страни за својот гласовен асистент наместо да го развива со сопствена технологија. Тој развој, во комбинација со заминувањето на Панг, го потресе ВИ-тимот и поттикна одлив на таленти.

Во моментов нема коментари за веста. Биди прв да коментира...

Остави коментар