„Нестле“ го разреши извршниот директор поради афера на работа

„Нестле“ (Nestlé SA) го разреши главниот извршен директор Лоран Фрекс по само една година поради тајна врска на работното место, продлабочувајќи ја кризата во раководството на најголемата светска компанија за храна, позната по својата конзервативна корпоративна култура.

Внатрешна истрага утврдила дека Фрекс имал тајна романтична врска со вработена од неговиот тим, со што го прекршил кодексот на однесување на „Нестле“, соопшти во понеделник навечер швајцарскиот сопственик на брендови како „Пурина“ (Purina) за храна за миленичиња и чоколадите „КитКат“ (KitKat). За негов наследник е именуван Филип Навратил, кој раководи со брендот за кафе „Неспресо“ (Nespresso).

„Ова беше неопходна одлука,“ изјави претседателот на управниот одбор Пол Булке во соопштението. „Вредностите и управувањето на ‘Нестле’ се силна основа на нашата компанија. Му се заблагодарувам на Лоран за неговите години служба.“

Брзата промена ја продлабочува турбуленцијата во раководството на „Нестле“. Фрекс ја презеде функцијата по изненадното разрешување минатата година на Марк Шнајдер, кој беше отстранет поради слаби резултати за време на неговиот речиси осумгодишен мандат. Во тоа време, Фрекс беше доживуван како сигурна фигура што ќе ги врати традиционалните сили на „Нестле“, откако Шнајдер – лидер што не доаѓа од редовите на компанијата – ја насочи во нови правци.

„Ова се случува во чувствителен момент, бидејќи ‘Нестле’ веќе е под лупа поради негативниот медиумски притисок,“ изјави Жан-Филип Берчи, аналитичар во „Вонтобел“ (Vontobel). „‘Нестле’ наскоро треба да влезе во помирни води, откако нервите на инвеститорите беа тестирани во изминатите неколку месеци.“

Bloomberg

„Нестле“ соопшти дека истрагата била надгледувана од Пол Булке и водечкиот независен директор Пабло Исла, со поддршка од независни надворешни советници. Компанијата го номинираше Исла да го наследи Булке како претседател на управниот одбор следната година. Според лице запознаено со ситуацијата, случајот со Фрекс првпат бил пријавен до раководството преку внатрешниот систем „speak up“. Откако обвиненијата не можеле да се потврдат со првичната истрага, преку истиот систем биле изнесени нови сомнежи и тогаш започнала подетална истрага со надворешни советници, додаде лицето кое побара да остане анонимно поради чувствителноста на темата.

Фрекс нема да добие испратнина, изјави портпарол на компанијата.

Други разрешувања

Разрешениот директор е најновиот во низата раководители на компании од секторот за потрошувачка и малопродажба кои во последниве години ги изгубија своите работни места поради врски на работното место.

„Мекдоналдс“ (McDonald’s Corp.) во 2019 година го разреши тогашниот извршен директор Стив Истербрук поради љубовна врска со вработена, а во 2025 година „Колс“ (Kohl’s Corp.) го отстрани извршниот директор Ешли Бјукенен, кој доделил милионски бизнис-договори на своја романтична партнерка.

Фрекс се обиде да го поттикне растот и да ги придобие потрошувачите преку зголемување на буџетот за рекламирање и со вложување во помал број, но поголеми производни проекти. Исто така, започна стратешка ревизија на послабите брендови витамини и го издвои бизнисот со вода на „Нестле“ во самостојна единица. Сепак, не успеа да ја врати довербата на инвеститорите – акциите на „Нестле“ паднаа за 17 отсто за време на неговиот мандат, во споредба со околу 5 отсто пад кај конкурентот „Јунилевр“ (Unilever Plc).

Продажните количини на „Нестле“ се намалија за 0,4 отсто во второто тримесечје.

Новиот извршен директор

Навратил, ветеран во компанијата со повеќе од 20 години искуство, се приклучи на управниот одбор на почетокот од оваа година. Пред да застане на чело на „Неспресо“ (Nespresso), тој беше виш потпретседател и раководител на Стратешката бизнис-единица за кафе, каде што беше одговорен за глобалната стратегија на брендот „Нескафе“ (Nescafé) и за лиценцното партнерство со „Старбакс“ (Starbucks).

„Во целост ја прифаќам стратешката насока на компанијата, како и акцискиот план што е во сила за да го поттикне успехот на ‘Нестле’,“ изјави тој синоќа.

Навратил има потенцијал да го забрза долгорочниот раст и да разгледа реструктурирања на портфолиото, како излегување од сегментите со послаб раст, како што се житарките и водата, изјави Данкан Фокс од „Блумберг интелигенс“ (Bloomberg Intelligence). Бидејќи Навратил сè уште нема наполнето 50 години, тој би можел да има мандат подолг од една деценија, додаде Фокс.

Друг предизвик за „Нестле“ се глобалните трговски тензии поттикнати од тарифите на американскиот претседател Доналд Трамп. Фрекс често нагласуваше дека околу 90 отсто од производите на „Нестле“ што се продаваат во САД се произведуваат на домашен терен. Еден значаен исклучок се капсулите „Неспресо“ (Nespresso), кои се произведуваат исклучиво во Швајцарија и сега се соочуваат со тарифа од 39 отсто.