Настојчивата швајцарска лидерка му се спротивстави на Трамп - тоа ѝ се удри од глава

Карин Келер-Зутер, претседателка на Швајцарија, се восхитува на истрајноста на поранешната британска премиерка Маргарет Тачер и е позната по својот технократски и упорен стил. Но токму тие нејзини особини ѝ се удрија од глава кога му се спротивстави на Доналд Трамп и ја одведе својата земја во криза.

Позната во швајцарската политика под кратенката ККС, таа ја доживеа најлошата седмица во својата повеќе од три децении долга кариера. Дури полоша и од 2023 година, кога за време на бурен викенд ја туркаше присилната аквизиција на „Кредит Свис“ (Credit Suisse) од страна на „УБС груп“ (UBS Group AG), во обид да го ублажи ударот врз вредниот банкарски сектор на земјата.

Откако Трамп воведе највисоки царини во развиениот свет врз Швајцарија, дури 39 отсто, што е повеќе од двојно од стапката на Европската Унија, на повидок нема никакво олеснување.

Откако 61-годишната Келер-Зутер се врати од последниот обид за договор во Вашингтон со празни раце, швајцарската влада по итниот состанок на седумчлениот федерален совет во четвртокот понуди малку одговори, соопштувајќи дека ќе продолжи да се обидува да обезбеди отстапки.

Иако раководењето со земјата е заедничка одговорност, особено поради фактот што претседателската функција се ротира секоја година меѓу членовите на кабинетот, царинскиот дебакл сепак носи личен печат на Келер-Зутер.

Во интервју за „Блумберг“ минатата есен, на прашањето кои личности ѝ се инспирација во лидерството, политичарката, која е и министерка за финансии, ја истакна својата почит кон Маргарет Тачер. Рече дека таканаречената Челична Дама била „вистинска личност“, која покажала дека знае да „се држи до своите убедувања и одлуки“.

Слична решителност ја натера Келер-Зутер да му се спротивстави на Трамп. Изгледаше дека потегот ќе се исплати, швајцарските преговарачи веруваа дека договорот е на повидок, но потоа следуваше непријатен телефонски разговор минатата недела.

Со тон што беше опишан како поучувачки, Келер-Зутер ја отфрли тезата дека Швајцарија ѝ „краде“ на Америка и инсистираше во разговорите да бидат вклучени и услугите. Но тоа директно се косеше со фокусот на Трамп, кој ја потенцира трговската нерамнотежа на САД во стоки како што се луксузните часовници, златото и фармацевтските производи.

Трговски биланс на САД по земји

Bloomberg

Парадоксот со кој се соочи Келер-Зутер е што какви било отстапки би биле политички скапи, а притоа не би имале суштинско влијание врз трговскиот дефицит. Но изгледот е важен, а таа не му даде на Трамп ништо што тој би можел да го претстави како победа. Во интервју за „Си-ен-би-си“ (CNBC), Трамп изјави дека швајцарската претседателка „не сакала да слуша“.

На прес-конференција во швајцарскиот главен град Берн, одржана во четвртокот, Келер-Зутер повторно ги отфрли тврдењата дека Швајцарија им нанесува штета на САД. „Слушав“, рече таа. „Но не се согласувам дека Швајцарија е одговорна за загуба од 40 милијарди долари“, додавајќи: „Јас ги застапував интересите на Швајцарија“.

Нејзиниот пристап е длабоко вкоренет во швајцарскиот прагматизам. Родена во мало село на околу 60 километри источно од Цирих, политичката кариера ја започнала во 1992 година како членка на општинскиот совет во Вил.

Како членка на либералната, пробизнис ориентирана партија, постојано напредувала во хиерархијата. Конечно, во 2018 година станала федерална министерка, прво раководејќи го Министерството за правда, а потоа во 2023 година станала највисока финансиска функционерка во земјата, само втора жена на таа позиција од 1848 година наваму.

Кариерата на Карин Келер-Зутер – накратко:
Министерката за финансии на Швајцарија е активна во политиката повеќе од три децении.

Bloomberg

„Имав впечаток дека целиот свет го задржа здивот додека не најдовме решение“, изјави таа во интервју за јавниот радиодифузер СРФ во март 2024 година.

Но додека меѓународната заедница е вознемирена од трговските војни што ги започна Трамп, овој пат никој не чека на Швајцарија.

Кризата претставува уникатен предизвик за земјата со 9 милиони жители, отворајќи прашања за одржливоста на нејзината традиција на неутралност во време на геополитички превирања. Последните случувања, како пропаѓањето на „Кредит Свис“ и претстојниот референдум за данокот на наследство, исто така го нарушија имиџот на Швајцарија како една од најповолните бизнис-дестинации во светот.

По колапсот на „Кредит Свис“, Келер-Зутер стана клучна фигура во иницијативата за построги капитални барања за УБС. Избегнувајќи политичка стапица, таа ја препушти на парламентот одлуката дали швајцарската банка ќе мора целосно да ги гарантира своите странски подружници. Но токму тој потег доведе до раздор меѓу неа и УБС.

По неуспешните разговори со Трамп, Келер-Зутер повторно се соочува со притисок. Иако е позната како скептик во однос на продлабочување на односите со Европската Унија, нејзините опоненти сега го бараат токму тоа.

И покрај неуспехот, нејзината оставка се смета за малку веројатна. Ротациската природа на швајцарското претседателство значи дека промените се редовни и предвидливи, па ненадејните заминувања се реткост. Таа во моментов не се соочува со сериозна конкуренција во рамките на сопствената партија, која има потреба од нејзиниот профил во услови на опаѓање на поддршката. Притоа, и од другите членови на кабинетот речиси нема притисок.

„Победуваме заедно и губиме заедно“, изјави швајцарскиот потпретседател Ги Пармелен, кога беше прашан дали таа треба да ја преземе вината. Федералниот совет, додаде тој, зборува со еден глас.

Келер-Зутер не се заплашува лесно. Додека беше министерка за правда и водеше кампања против насилството на фудбалските стадиони, еднаш лично му се спротивстави на хулиган што ја фотографирал и му нареди да ја избрише фотографијата. Тој нејзин борбен дух потсетува на уште еден од нејзините лични херои.

„Голема обожавателка сум на Мухамед Али“, изјави таа. „Тој ми е идол затоа што беше многу талентиран, многу силен и помина низ навистина тешки ситуации“.

Во моментов нема коментари за веста. Биди прв да коментира...

Остави коментар