Скапите кредити се сериозен товар за бизнисите, а меѓу дејностите што во моментов се најмногу погодени е земјоделството, на кои му треба поголем обрт на средства за инвестиции пред претстојната сезона.
Ова го посочува во интервју за „Блумберг Адрија“ потпретседателката на Сојузот на стопански комори, Габриела Кулебанова, која вели дека освен скапите кредити, дополнителен проблем се и банкарските провизии.
„Истовремено имаме и раст на платите, така што ударот и од каматите ќе се почувствува многу, со воздржување за поголемо инвестирање на долг рок... Околу дејностите што ќе бидат најмногу погодени од каматните стапки, пак, ќе бидат оние бизниси што имаат сезонско работење. Сега на потег е земјоделството, каде што се инвестира повеќе во моментов, на бизнисите им требаат поголеми обртни средства за да го реализираат својот плод во текот на следните месеци. А ако гледаме пошироко во светот и пропаѓањето на одредени банки, кај нас банките, според резултатите од првиот квартал, се едни од најпрофитабилните бизниси во нашата држава, не е само ударот од зголемувањето на каматните стапки туку имаме зголемување на сите аспекти на провизиите. Едноставно, компаниите се борат со овие проблеми по ковидот, кога се начна еден економски раст, па имаме економска криза, во тек е сè уште и војната во Украина. Едноставно, неопходно е менување на бизнис-плановите, следење на новите трендови, и ќе мора некако да го избалансираме ов, но мислам дека во нашата држава е малку потешка ситуацијата од другите, како една ранлива економија“, вели Кулебанова.
За зголемување на продуктивноста на компаниите, пак, таа истакна дека е неопходно и менување на некои закони, кои, како што рече, се со социјалистички основи вметнати во капиталистичко време.
„Едни од нашите предлози како Сојуз на стопански комори се ревидирање на бројот на празници, ревидирање на мерењето на платата на работниците во согласност со работата по час... Ние како држава одиме на надградување на некои постојни закони што се правеле на други темели. Ние треба да имаме поврзување помеѓу АВРМ, Пензискиот фонд и УЈП. Секој треба да добие социјален број, како што е на Запад, и врз база на неговото учество да се плати неговиот труд“, посочи Кулебанова.
Целото интервју погледнете го на линкот.