Владата најави, па се повлече од намерата за враќање на ДДВ од 5 на 18 отсто за пелетите. Во меѓувреме, пак, на пазарот настанаа мала паника и зголемена побарувачка, но состојбата полека се смирува, вели во интервју за „Блумберг Адрија“ Владимир Стојановски од Здружение на производители и увозници на пелети.
„Кога се најави мерката имаше зголемена побарувачка и малку тешко се одговараше во тие денови, но, за среќа, кратко траеше тоа. Ние брзо реагиравме, се обративме до сите пратенички групи во Собранието, имавме средби и испративме наши аргументи против зголемувањето на ДДВ. За среќа, имаше слух дека огревот не е луксузно добро и брзо се ретерираше и веќе имаме некое стабилизирање на пазарот, каде што побарувачката е нормална“, вели Стојановски.
За време на врвот на енергетската криза минатата година во земјава имаше сериозен недостиг од пелети и раст на цените, а Владата во неколку наврати обвини дека производители на пелети кријат резерви и ги „пумпаат“ цените.
Производителите, пак, се децидни дека „воено профитерство“ немало и дека тоа било последица од потресите на меѓународните пазари.
„Мината година имаше ценовен шок, но тоа не беше само кај нас. Во Германија, на пример, цената од 250 евра за тон стигна до 800 евра. Сега е повторно падната приближно на 350. Во тој период ценовен шок имаше и во Македонија и дојде до одредено 'ладење' на пазарот. Но, во моментов имаме сериозна стабилизација на тој пазар. Цените се вратени во нормала, не како што беа, но сепак со прифатливо покачување. Тоа што се случи лани беше исклучок. Сведоци сме дека во многу сегменти во економијата се случија драматични пресврти. Ние тогаш се обидувавме да објасниме дека ценовниот шок не е поради локалните трговци туку поради регионалното и континенталното движење, на кое ние не можеме да влијаеме. Македонија е 80 отсто увозно зависна и цените зависат и од случувањата на странските пазари. Немаше никакво 'воено профитерство', тоа беше едно сериозно нарушување на пазарот во пошироки рамки“, вели Стојановски.
Toj е оптимист дека годинава нема да има ценовни шокови, а понудата може да ја задоволи побарувачката.
„Во моментов сите изгледи се дека има доволно количество на пазарот, можеби е нормално, како се движиме во сезона, да има одредено поместување во цените од 5 до 10 проценти во делот на разлики за лето/зима, но тоа секогаш било така. Меѓутоа, засега не очекуваме поголеми потреси, бидејќи сметаме дека моментално пазарот е доволно задоволен со количества, нашиот регионален пазар, а со тоа и Македонија. Така што сметам дека ќе имаме една мирна, стабилна зима, луѓето не треба да очекуваат поголеми потреси. Тоа е нашиот став во моментов. На пример, лани ние уште во јуни најавивме дека ќе има сериозен потрес, бидејќи ги имавме информациите, ја гледавме ситуацијата и сè упатуваше на тоа дека ќе има недостиг. Во моментов сликата не е таква. И мислам дека тоа е едно стабилизирање на подолг рок и добро е да биде така, бидејќи зборуваме за едно еколошки прифатливо гориво, кое треба да биде дел од нашето загревање наместо фосилните горива“, вели Стојановски.