Во следниот период нема да има промена на цената на лебот и на пекарските производи бидејќи има соодветна стабилност на пазарите, вели во интервју за „Блумберг Адрија“ Горан Ѓорѓиевски, потпретседател на ССКМ и претседател на Агробизнис-комората.
„Иако има мал притисок во однос на излегувањето на Русија од договорот со Украина за извоз на украинска пченица, до есен ќе имаме конзистентни и стабилни цени на основните пекарски производи“.
Тој појаснува дека сè зависи од случувањата на отворената берза. Доколку цените на суровините имаат стабилна вредност и не се зголемат како минатата година, нормално дека и цените на сите производи во прехранбената индустрија ќе имаат конзистентна вредност односно нема да има силни покачувања ниту потреба од замрзнување на цените на основните производи од страна на Владата.
Во однос на цената на струјата, Ѓорѓиевски вели дека во некои компании во кои имало можност се инвестирало во фотоволтаици на покривите, како голема придобивка и поволност што овозможува сами за себе да произведувате струја.
„Некои од компаниите се подготвија на тој начин, но се надевам дека нема да дојде до огромен скок на цената на струјата како минатата година, кога високата цена на електричната енергија направи ’пустош’ во компаниите. Тогаш фирмите се задолжуваа за да го издржат тој товар од цените на струјата“, вели Ѓорѓиевски.
Тој посочува дека, доколку се повтори сценариото на големи скокови на цената на струјата, македонската влада треба да ги следи регионалните примери за помош на компаниите. Во опкружувањето, според Ѓеорѓиевски, компаниите имаа континуирана помош со субвенционирана цена на електрична енергија за време на енергетската криза.
„Ние бевме на слободен пазар, што многу тешко се одрази на компаниите. Се надевам дека ако има слична ситуација, ќе има слух за ваквото барање, фирмите нема да може да го издржат тој товар“, вели Ѓорѓиевски.
Човечките ресурси односно недостигот од кадар и ликвидноста на компаниите се клучните ризици во следниот период.
„Влијанието што доаѓа од западните земји во насока на нивна апсорпција на вработени од овие простори креира недостиг од кадар во домашните компании. Тоа од една страна води кон раст на платите, што секако е позитивно во еден сегмент, но бидејќи станува збор за голем недостиг од вработени во бизнисот, се наоѓаме во ситуација одредени компании тешко да го трпат тој удар на раст на платите, но и недостигот од вработени“, вели Ѓорѓиевски.
Според него, решението за недостигот од вработени во приватниот сектор се решава со кратење на државната администрација.
„Треба да се направи стратегија на преземање вработени од државната администрација и нивен трансфер кон приватниот бизнис“, вели Ѓорѓиевски.