По новогодишните празници, Владата и кинеската компанија „Синохидро“ ќе почнат преговори за потпишување нов анекс на договорот за изградба на автопатот Кичево - Охрид, чија изградба почна од 2014 година, а автопатот долг 57 километри сè уште не е изграден.
„Препораката на неколку експерти беше да има нов рок за изградба, а не раскинување на договорот, но без цврсти гаранции за финализирање на проектот, нема да има нов анекс. Сè додека сум вклучен, тоа ќе биде ставот на сите преговори. Десет години е предолго време за овој проект“, вели за „Блумберг Адрија“ вицепремиерот задолжен за економски прашања Фатмир Битиќи.
Данок на солидарност
Ако Законот за данокот на солидарност падне на Уставен суд, Владата ќе им ги врати парите на компаниите од кои ги наплатила. Но сепак вицепремиерот Битиќи смета дека нема да се случи тоа, бидејќи истиот тој нема неуставни елементи.
„Право е на компаниите, преку нивните легитимни претставници, односно стопанските комори да го оспорат законот. Секоја одлука на судовите, ние ја почитуваме. Ако евентуално има одлука за неуставност, а сметам дека не би требало да има таква одлука, но ако евентуално биде донесена, ќе ја испочитуваме и ќе најдеме механизам како да им се вратат средствата на компаниите“, вели Битиќи.
Од Уставниот суд, пак, за „Блумберг Адрија“ велат дека се работи на предметот, а искуства се собираат од повеќе држави за да се одлучи по поднесената иницијатива на стопанските комори, кои сметаат дека наплатата на солидарниот данок, на начинот на кој ја донесе Владата, не е уставна.
Стопанството поднесе иницијатива за оценување на уставноста на новото законско решение според кое данокот со стапка од 30 отсто ќе го плаќаат сите компании со вкупен приход поголем од десет милиони евра што оствариле добивка поголема од просечната добивка во законски утврдените претходни периоди, зголемена за 20 отсто.
Во емисијата „Зум ин“, вицепремиерот Битиќи зборуваше и за платите на функционерите што се зголемија за 78 отсто, а иако Владата најави дека ќе се најде модел за нивно намалување до крајот на годината, сепак не се случи тоа. Битиќи вели дека сè уште нема консензус по тоа прашање, иако имало неколку предлози.