Кои се најдобри летни пневматици за автомобили: Тест на германски АДАК

Почетокот на пролетта е период кога возачите ги менуваат зимските пневматици на автомобилите со летни. За таа цел германскиот автомобилски клуб АДАК (ADAC) тестираше 16 модели на летни пневматици со големина 215/55 R17, кои се погодни за мали теренци и автомобили од пониската средна класа. Тестот покажа дека вкупниот биланс е позитивен, но има и пневматици со мали слабости. Имено, од 16-те тестирани модели, три се покажаа добри, дванаесет беа задоволителни, а само еден доби оцена адекватен. Како што велат од АДАК, за среќа овој пат нема пневматици со лоши перформанси.

Три најдобри

Трите гуми оценети како добри доаѓаат од брендовите „Континентал“ (Continental), „Мишелин“ (Michelin) и корејскиот производител на гуми „Кумхо“ (Kumho), што е своевидно изненадување.

„Генерално, сите три модели се многу избалансирани и затоа се препорачуваат без никакви ограничувања. А сепак секој фаворит поставува индивидуални акценти. Со своите натпросечни перформанси на суви и влажни коловози, моделот ’континентал премиум контакт 7’ (Continental PremiumContact 7), кој се тестира првпат, очигледно е број еден во категоријата безбедност при возење со оценка 1,7“, наведуваат од АДАК.

Оттаму додаваат дека истото тоа важи и за „мишелин прајмаси 4+“ (Michelin Primacy 4+) кога станува збор за еколошките перформанси, каде што овој модел јасно се истакнува барем во директна споредба со другите два пневматици оценети како добри. Од АДАК укажуваат дека кај моделот „кумхо екста ХС52“ (Kumho Ecsta HS52) има своевиден компромис.

„Кога станува збор за безбедноста при возење, тој е на исто ниво како ’Мишелин’, а кога станува збор за еколошките перформанси е еднакво одржлив како и ’Конти’ (Conti). Но, како и гумата од Хановер, ’Кумхо’ не постигнува повеќе од задоволителен резултат во однос на еколошките перформанси поради релативно високата тежина на пневматиците“, посочуваат од АДАК.

За влакно меѓу најдобрите

Другите места (групата пневматици што се оценети како задоволителни, но со оценка 2,6 односно на граница до оценката добри) вклучуваат производи од „Дебика“ (Debica), полски бренд од групацијата „Гудјир“ (Goodyear Group), „Данлоп“ (Dunlop), „Бриџстоун“ (Bridgestone) и „Фулда“ (Fulda).

„Дебика престо УХП 2“ (Debica Presto UHP 2), „данлоп спорт макс РТ2“ (Dunlop Sport Maxx RT2) и „фулда спорт контрол 2“ (Fulda SportControl 2) имаат малку послаби резултати во однос на безбедноста при возење поради малку полошите перформанси на влажно и не можат да го компензираат тоа со оцената за еколошкиот баланс. „Бриџстоун туранца 6“ (Bridgestone Turanza 6), пневматици што се нови на пазарот, се подобри кај еколошките перформанси, но им недостига оцената добар во однос на безбедноста при возење на суви и влажни коловози.

Пневматици со задоволителни перформанси

„Хенкок вентус прајм“ (Hankook Ventus Prime4), „гудјир ефишент грип перформанс 2“  (Goodyear EfficientGrip Performance 2) и „фалкен зиекс ЗЕ 310 екоран“  (Falken Ziex ZE 310 EcoRun) се поблиску до оценката три. „Хенкок“ и  „Гудјир“ имаат врвни оценки за нивната еколошка рамнотежа, но имаат проблеми на влажни („Хенкок“) или суви патишта („Гудјир“). „Фалкен“ има слабости и на суви коловози и во исто време е најтешката гума на тестот, што доведува до девалвација на еколошката рамнотежа.

Следните брендови, со исклучок на „Семперит“ (Semperit), не постигнуваат добар резултат во ниту еден од двата главни критериуми. Кога станува збор за безбедноста при возење, мали слабости во перформансите што спречуваат подобар резултат имаат „нексен нфера примус“ (Nexen N'Fera Primus), „сеилун атрецо“ (Sailun Atrezzo ZSR2) и „линглонг спорт мастер“ (Linglong Sport Master), особено на суви патишта, а кај „гудрајд солмакс 1“ (Goodride Solmax 1) проблем се перформансите на влажни коловози.

Единствени оценети со доволно?

„Вредстеин ултрак“ (Vredestein Ultrac) се пневматиците што се на дното на табелата на АДАК. Сепак, како што велат оттаму, овие пневматици немаат ваква оцена поради перформансите за безбедност бидејќи овозможуваат безбедно возење и на суви и на влажни патишта.

„Еколошкиот отпечаток спречува подобар резултат односно абењето и кинењето“, наведуваат од АДАК.

Оттаму објаснуваат дека поради абењето овие пневматици најмногу завршуваат во околината. При долги патувања со конвој со идентични тест-возила и услови на патеката се предвидува дека километражата со овие пневматици ќе биде најмногу 27.200 километри. За споредба, со најотпорната гума на тестот, „кумхо екста“ може да се поминат 69.300 километри.

Во моментов нема коментари за веста. Биди прв да коментира...

Остави коментар