Германската индустрија нема да може целосно да се ослободи од влијанието на кризата која се случуваше во изминатите години, покажува истражувањето на „Блумберг економикс“ (Bloomberg Economics). Додека има високи очекувања за враќање на економијата од ударот на пандемијата и неодамнешната енергетска криза, новата анализа сугерира дека половина од проценетиот недостиг од 7 проценти во индустриската активност ќе се задржи.
Добро утро, подолу петте вести што ги издвоивме за почеток на денот.
Совети за почетници: Каде да се инвестираат 1.000 евра?
Каде да се инвестираат пари е дилема која најмногу ги мачи инвеститорите-почетници кои прв пат своите заштеди наместо во банка сакаат да ги пласираат на пазарот на капитал или во некакви други инструменти во надеж дека на тој начин ќе остварат поголем принос отколку банкарските камати. Со оглед на тоа дека и најголемите инвеститори во светот почнале од негде односно со некаков минимален почетен капитал, прашавме експерти за совети кои би им помогнале на малите инвеститори-почетници полесно да донесат одлука.
Прашањето беше каде да се инвестираат 1.000 евра? А, понудените одговори беа: во акции од домашни компании, акции од компании во странство, домашни инвестициски фондови, странски инвестициски фондови, диверзифицирано портфолио од неколку претходно наведени инструменти, во дополнително образование за пазарите на капитал или нешто друго.
ЕСГ или обични „ванила“ акции и обврзници?
Пазарот на ЕСГ-акции во 2024 година засега ги надминува „плејн ванила“ (англиски: plain vanilla - фраза за наједноставниот облик на средство или финансиски инструмент без додатоци) акции, но минимално. Побарувачката за компании кои ги исполнуваат ЕСГ критериумите и растот на средствата во ЕСГ фондовите придонесуваат кон овој тренд.
Од друга страна, цените на ЕСГ обврзниците до неодамна паѓаа побрзо од обичните („плејн ванила“) обврзници, но во последниот месец забележаа закрепнување и ги достигнаа цените на обичните обврзници. За овој тренд придонесе силната понуда на ЕСГ обврзници и поголемата ориентација на инвеститорите кон „плејн ванила“ обврзници поради можната поголема заработка од зголемената нестабилност.
Младите работници тешко се справуваат со обврските, покажа глобално истражување
Според една неодамнешна студија, помладите вработени пријавуваат повеќе проблеми на работа, додека постарите колеги се подобри. Само 31 отсто од работниците помлади од 35 години изјавиле дека се носат со работните обврски минатата година, според новиот годишен извештај за глобалната работна сила на „Галуп“ (Gallup Inc).
Тоа е помалку од 35 отсто претходната година, покажуваат податоците. Спротивно на тоа, 36 отсто од работниците од 35 години и постари рекле дека успешно се снаоѓаат, што е зголемување за 1 процентен поен од претходната година. Јазот од 5 процентни поени меѓу возрасните групи е најголем од најмалку од 2009 година.
Народната банка го поднесе барањето за членство во СЕПА
Народната банка го поднесе барањето за пристапување на земјава во Европската област за плаќања во евра (СЕПА) што претставува клучен исчекор за понатамошниот развој и интеграција на домашниот финансиски систем во европскиот економски простор. Гувернерката Анита Ангеловска-Бежоска, која го потпиша барањето, истакнува дека предностите од пристапувањето во СЕПА се многу значајни за граѓаните и за компаниите, имајќи предвид дека најголемиот број од плаќањата со странство се извршуваат во евра.
Пристапувањето кон СЕПА, за граѓаните и компаниите ќе значи пониски надоместоци, како и подобрено управување со паричните текови, имајќи предвид дека трансферите на СЕПА вообичаено се обработуваат во рок од еден работен ден, а кај инстант плаќањата, преносот на паричните средства ќе се извршува најмногу за 10 секунди, во кое било време во текот на денот, за викенди и за празници.
НАТО ја обвини Кина за поддршка на Русија во војната со Украина
Лидерите на НАТО објавија остра порака во која ја осудуваат воената поддршка на Кина за Русија поради знаците дека Пекинг развива напаѓачки дрон за конфликт со Украина. Во декларацијата објавена во средата вечерта за време на самитот на 75-годишнината во Вашингтон, НАТО ја опиша Кина како „одлучувачки двигател“ на руската војна против Украина.
Во изјавата детално се објаснува снабдувањето од Кина со материјали за двојна намена, како што се компоненти за оружје, опрема и суровини кои служат како инпути за рускиот одбранбен сектор. САД ги информираа сојузниците во НАТО за поддршката на Кина пред самитот, за да се создаде заедничката загриженост за растечкото одбранбено партнерство, според извори запознаени со ова прашање.
.webp){kind=icon}
