Германски црковен пензиски фонд сака да инвестира во кинески акции

Германски црковен пензиски фонд ангажира филијала во Хонгконг на кинеска фирма за да му помогне да инвестира во локални акции, во редок потег меѓу глобалните инвеститори, кои во принцип се претпазливи во однос на изложеноста на акциите на оваа земја.

Фондот КЗВК (KZVK), кој управува со 34,1 милијарди евра (40 милијарди долари), му додели 50 милиони долари на „Фулгол асет менаџмент“ (Fullgoal Asset Management) во вториот квартал, според извори запознаени со ова прашање. Фирмата добила мандат да  инвестира во кинески акции котирани во Хонгконг, континентална Кина и САД, изјавија изворите, барајќи да останат анонимни бидејќи информацијата е приватна.

Акциите во Кина и Хонгконг забележаа умерени добивки по серијата мерки за економски стимул од септември. Но големата распродажба во последните години - поттикната од регулаторни ограничувања, економско забавување и геополитички тензии - изненади многу глобални инвеститори на долг рок. Како резултат, аналитичарите забележуваат дека повеќето налози за берзите  во Кина се обновувања на портфолијата, а не нови распределби.

„Не забележавме значителен тренд на европски и американски сопственици на средства што доделуваат мандати за континентална Кина“, изјави Камерон Систерманс, шеф за повеќекласни средства за Азија во консултантската фирма „Мерсер“ (Mercer Inc.) „Ова е во согласност со нашите моментални препораки до клиентите, да конструираат портфолија на акции без долгорочни стратешки наклони кон поединечни земји“.

Bloomberg Mercury

 

И покрај мандатот, КЗВК одржува ниска изложеност на Кина. Пензискиот фонд има релативно малку акции во Кина  во споредба со големината на нејзината економија и пазарна капитализација, изјави членот на управниот одбор Оливер Ланг во интервју објавено во мај од „Европски инвестиции и пензии“ (Investment & Pensions Europe).

Фирмата за менаџирање со средства од Хонгконг е подружница  на „Фулгол фонд менаџмент“ (Fullgoal Fund Management Co.) од Шангај, која управува со околу 200 милијарди долари во средства и, меѓу другите, ја има Канадската банка на Монтреал како акционер. Нејзината филијала во Хонгконг управува со околу 3,8 милијарди долари, изјави еден од изворите.

КЗВК, со седиште во Келн, чие целосно име е „Црковен дополнителен пензиски фонд на Здружението на германски епархии“ (Kirchliche Zusatzversorgungskasse des Verbandes der Diözesen Deutschlands), управува со фондови за вработени во Католичката црква и добротворни организации. Тој опслужува повеќе од 240.000 пензионери, според неговата веб-страница.

Големите глобални институции, кога инвестираат во пазарите во развој, имаат тенденција да направат минимална распределба од педесетина милиони долари, според анкетата од 2024 година на „Финсити.Токио“ (Fincity.Tokyo).

Претставниците на КЗВК не одговорија на барањата за коментар. Портпаролот на „Фулгол“ исто така одби да коментира.

Во меѓувреме, средствата итаат кон други делови од Азија. Бројот на фондови за акции што имаат седиште надвор од Кина нагло порасна во последните години, со рекордни лансирања во 2023 и 2024 година, според извештај објавен минатата недела од „Морнингстар“ (Morningstar Inc). Таквите фондови акумулираа изненадувачки 10,5 милијарди долари во нето нов капитал минатата година.

„Регулаторните ограничувања и проблемите со управувањето, зголемените геополитички тензии низ светот и економската неизвесност во Кина од пандемијата на ковид-19 ги вознемирија инвеститорите“, напиша Матие Каквино, виш директор за рејтинзи на стратегии за акции во „Морнингстар“, во извештајот. „Тоа го поттикнува интересот за понудите надвор од Кина“.