.webp){kind=icon}
Малолетната ќерка на севернокорејскиот лидер Ким Џонг Ун добива лекции како да ја преземе земјата, им укажала на пратениците јужнокорејската разузнавачка агенција, што е брз напредок за девојчето, кое својот прв јавен настап го имаше пред помалку од две години.
Џу Ае - која државните медиуми ја нарекуваат „почитувана ќерка“ и „сакано дете“ - е кандидатка да биде следна во редот во семејството Ким, кое владее со државата од нејзиното основање кон крајот на 1940-тите, изјавија јужнокорејски пратеници што добиле известување од националната разузнавачка служба.
Добро утро! Ова се петте вести што треба да ги знаете на почетокот од денот.
Со урбано рударство до развој и помало загадување во Македонија
Како еден од главните двигатели за рударската индустрија во иднина меѓу другото се посочува развојот на таканареченото урбано рударство (т.е. рециклирање). Тоа значи искористување на технологијата, вклучувајќи ги и револуционерните импликации на вештачката интелигенција, за да се унапредат продуктивноста, одржливоста и безбедноста.
Од ПВЦ (PricewaterhouseCoopers – PwC) велат дека рециклирањето минерали е веќе вообичаено и тоа е клучен додаток на традиционалното рударство.
„Урбаното рударство, познато и како рециклирање или секундарно производство, еволуираше во софистицирана индустрија од повеќе милијарди долари. Во одредени случаи рециклираните метали може да имаат ’зелена премија’, бидејќи им се допаѓаат на потрошувачите што се насочени кон одржливост и индустриските корисници што им даваат приоритет на еколошки одговорните методи на производство“, се наведува во нивната анализа.
Венецуела тврди дека била погодена од сајбер-напад од Македонија
Главниот обвинител на Венецуела соопшти дека со сајбер-напад извршен од земјава имало обид да се влијае врз резултатите на претседателските избори во јужноамериканската земја, кои се одржаа во неделата.
Според неговите тврдења сајбер-нападот бил во корист на опозицијата, а против досегашниот претседател Николас Мадуро.
На ова реагираше министерот за дигитална трансформација, Стефан Андоновски, кој посочи дека „станува збор за социјалистички режим што со години често лиферува информации непоткрепени со докази и обвинува засегнати страни и држави што немаат одговорност во таквите случаи“.
Тој од властите на Венецуела побара со докази да го поткрепат изнесеното обвинување.
Германската инфлација неочекувано порасна
Германската инфлација забрза во јули, што може да ја зголеми претпазливоста на Европската централна банка во однос на дополнителното намалување на каматните стапки. Потрошувачките цени во јули годинава се зголемија за 2,6 проценти во однос на истиот месец претходната година и за 2,5 проценти во однос на претходниот месец.
Аналитичарите анкетирани од „Блумберг“ предвидоа дека темпото ќе остане стабилно. Додека трошоците за енергија се намалија помалку отколку во јуни, притисокот врз цената на храната се зголеми, а услугите останаа стабилни.
Пред следниот состанок во септември, претставниците на ЕЦБ ќе имаат уште еден месец податоци за инфлацијата и повеќе информации за платите и корпоративните профити.
Рекорден удел на кинески е-возила пред воведувањето на санкции од ЕУ
Кинеските брендови зазедоа рекордни 11 отсто од европскиот пазар на електрични автомобили во јуни, пред строгите царини на Европската Унија, кои стапија во сила на почетокот на месецов.
САИЦ (SAIC Motor) ја предводеше пазарната офанзива, доставувајќи им го својот хечбек МГ4 (MG4) на дилерите во големи количества, според „Датафорс“ (Dataforce). Автомобилите регистрирани пред 5 јули може да им се продаваат на купувачите без дополнителни царини за увезени електрични возила.
Кинеските марки регистрираа повеќе од 23.000 електрични возила низ Европа во текот на месецот, што е рекордна бројка.
Дали зголемувањето на обемот на продажба ќе може да се задржи ќе се види во наредните месеци, кога ќе заживеат новите царини на ЕУ. За САИЦ, дополнителните давачки значат зголемување на трошоците за 38 проценти на ова поле, додека БЈД ќе плати дополнителни 17 проценти на веќе постојните давачки од 10 проценти.
„Нетфликс“ може да издаде прва блучип-обврзница
Компанијата „Нетфликс“ (Netflix Inc.) го испитува интересот на инвеститорите за прва емисија на обврзници од инвестициско ниво што би помогнало да се рефинансира долгот што достасува (во износ 1,8 милијарда долари), изјавија за „Блумберг“ извори запознаени со плановите.
Се очекува во емисијата да бидат вклучени хартии од вредност што достасуваат за најмалку десет години, велат изворите што не сакаа да бидат именувани бидејќи информацијата не е јавна. „Морган Стенли“ (Morgan Stanley), „Голдман Сакс“ (Goldman Sachs Group Inc.), „ЏП Морган“ (JPMorgan Chase & Co.) и „Велс Фарго“ (Wells Fargo & Co) организирале повик за инвеститори одржан во понеделникот.
Емисијата ќе биде прва откако најголемиот светски сервис за стриминг доби инвестициски рејтинг во март минатата година. Минатата недела, и „Мудис“ (Moody's Ratings) и „Ес енд Пи глобал“ (S&P Global Ratings) го подигнаа рејтингот на „Нетфликс“ за уште една оценка.
