.webp){kind=icon}
Северна Македонија денес е на одличен пат кон ЕУ. Но би сакал да пренесам порака до сите политички сили во земјата - соработувајте. Ова е тимска задача, треба да играте како национален фудбалски тим, а не како шампионат на поединци. Треба заедно да работите, инаку нема да бидете успешни, порача денеска еврокомесарот за буџет Јоханес Хан, јави МИА. Во воведното обраќање на Скопскиот економски и финансиски форум (СЕФФ), Хан изрази уверување дека Северна Македонија ќе стане можеби 28-та членка на ЕУ. Тој повтори дека евроинтеграцијата и натаму останува процес базиран на заслуги.
Хан рече и дека не треба да се носат избрзани законски решенија, како и дека владеењето на правото мора да се почитува.
„Можам само да потврдам дека овој процес останува процес базиран на заслуги. Не е дека чекаме најслабите или најуназадените кандидати да го фатат чекорот со преостанатите. Не. Ако сте ги оствариле нештата што треба да ги остварите, заслугата ќе ви биде дадена. Јас ќе останам ваш постојан бранител и промотор, ќе правам сè што е потребно во иднина. Важно е главните политички сили да работат заедно на конечната цел на Северна Македонија. Ова е нешто што морате да го ставите настрана - партиските, политичките интереси. За ова можете да разговарате на многу различни прашања, но ова е национално прашање, ова е главното прашање во кое мора да ги вложите сите ваши заложби, сите сили во Собранието за да ги постигнете вашите цели. Ако го постигнете тоа, можете навреме да го постигнете тоа што е потребно“, потенцира Хан.
Од членството во ЕУ, дополни тој, придобивки ќе имаат сите, и економски и општествени. Рече дека треба да се зграпчи моментот и да се работи заедно. „Северна Македонија ќе стане можеби 28-та членка на ЕУ. Знам дека добро ви оди, дека добро се одвива скринингот, но би сакал да пренесам порака до сите политички сили во земјата - соработувајте, ова е тимска задача, треба да играте како национален фудбалски тим, а не како шампионат на поединци“.
Според него, обединувањето на Европа ќе се комплетира само кога сите земји од европскиот континент ќе станат членки на ЕУ.
И ЕУ треба, додаде тој, да си ја заврши домашната задача во своите земји што уште не се таму каде што сакаат да бидат. „Но, важно е да се разбере дека ЕУ е придржување до заедничките вредности, интереси, перспективи и разбирање за тоа како ги гледаме поединците. Затоа, владеењето на правото не е наша опсесија, туку предуслов. Аспектите поврзани со владеењето на правото треба да се спроведат“.
Тој рече и дека нема да зборува за бројки зашто сосема го поддржува она што претходно го кажаа премиерот Димитар Ковачевски и министерот за финансии Фатмир Бесими околу економските бенефиции од членството на земјата во ЕУ. Хан во овој контекст уште еднаш потсети дека ЕУ не е банкомат, туку нешто повеќе од тоа, алудирајќи на заедничките вредности.
„Од 70 до 75 отсто од инвестициите се од Европа, извоз, увоз. Затоа е важно да се комплетираат сите заложби. И во минатото дадовме многу предлози, како Стратегијата за Западен Балкан во 2018 година, идеи за натамошен развој. За време на мојот мандат како комесар за проширување се чувствував осамено, без поголема поддршка за проширувањето. Затоа морам да кажам ’благодарам, Владимир Путин’, оваа ситуација е променета зашто се промени геополитичката ситуација. ЕУ не е банкомат, туку нешто повеќе од тоа, тоа се заедничките вредности“, порача Хан.
Пред него се обратија премиерот Димитар Ковачевски и министерот за финансии Фатмир Бесими.
