Водич за разбирање на суштината на конфликтот меѓу Израел и Хамас

Борбата меѓу Арапите и Евреите за власт над Светата земја датира повеќе од еден век и доведе до седум големи војни. Последната избувна на 7. октомври кога исламистичката палестинска група Хамас, која е посветена на уништување на Израел и која САД и Европската унија ја прогласија за терористичка организација, од Појасот Газа го нападна јужниот дел на Израел, убивајќи 1.300 луѓе во градовите, кибуците, армиските бази и на музички фестивал во пустината. Повеќе од 3.000 луѓе загинаа во израелската одмазда за нападот. Ова е водич за оние кои се заинтересирани за подобро разбирање на конфликтот.

1. Кои се корените на конфликтот?

Арапите и Евреите кои живееле во Светата земја биле под Отоманската империја до крајот на Првата светска војна, кога Британија, еден од победниците во војната, ја презела власта. Во овој период, еврејската имиграција од Европа во она што тогаш се нарекуваше Палестина значително се зголеми, особено во 30-тите, со оглед на нацистичкиот прогон на Евреите. Отпорот на еврејската имиграција и зголемениот национализам меѓу Арапите доведоа до бунт во доцните 30-ти. Во обид да се запре арапско-еврејското насилство, британската комисија во 1937 година препорача поделба на Палестина на две држави, една арапска, една еврејска. Обединетите нации прифатија различен план за поделба во 1947 година. Арапите ги отфрлија двата плана, што доведе до прогласување независност на Израел во 1948 година и првата арапско-израелска војна. Тој период произведе повеќе од половина милион арапски бегалци.

2. Кои се Палестинците?

Во војната во 1967 година, Израел, меѓу другите територии, го зазеде и Појасот Газа од египетска контрола и Западниот Брег од јорданска контрола. Тоа ги стави арапските Палестинци кои ги населуваа тие две области, нашироко познати во тоа време само како Палестинци, под воена окупација, што дополнително го подгрева национализмот и незадоволството меѓу нив. Голем дел од Палестинците се сунитски муслимани. Малцинство се христијани.

3. Што е Хамас?

Станува збор за арапски акроним за името Движење на исламскиот отпор - Хамас, а организацијата е основана во 1987 година за време на првата палестинска интифада, или востание, против израелската окупација. Тоа на некој начин е нов никулец на египетското Муслиманско братство, исламистичко религиозно, општествено и политичко движење. Првично се здоби со популарност меѓу Палестинците со воспоставување мрежа на добротворни организации кои се занимаваат со сиромаштијата, како и со здравствените и образовните потреби. Подоцна стана познат по кампањата на самоубиствени бомбашки напади и друг вид на напади врз Израелците.

4. Што сака Хамас?

Главната цел на Хамас, како што е артикулирано во ревидираната повелба издадена во 2017 година, е уништување на државата Израел. Документот ја опишува целата Света земја како „арапска исламска земја“ и вели дека Хамас ја отфрла секоја друга опција освен нејзино „целосно ослободување“. Според ревидираната повелба, конфликтот на групата е со „ционистичкиот проект“, а не конретно против Евреите. Оригиналната повелба на Хамас вели: „Судниот ден нема да дојде додека муслиманите не се кренат против Евреите и не ги убијат“. Поновиот документ вели „да се спротивставиме на окупацијата со сите средства и методи е легитимно право загарантирано со божјите закони“. Анкета на почетокот на септември во Појасот Газа и Западниот Брег сугерираше дека, доколку им се даде можност на официјални избори, 34 отсто од Палестинците би гласале за Хамас, наспроти 36 отсто за Фатах, главната фракција на секуларната Организација за ослободување на Палестина (ПЛО), поранешна герилска група која склучи мир со Израел во 1993 година.

Depositphotos

5. Што е ционист?

Ционистичкото движење, кое потекнува од крајот на 19. век во Европа како одговор на антисемитизмот, го поддржа воспоставувањето татковина за еврејскиот народ во нивната древна земја. Името го добило по еден рид во Ерусалим наведен во Стариот завет. Бидејќи движењето ја постигна својата цел, денес ционист е некој кој го поддржува развојот и заштитата на државата Израел.

6. Што е Појасот Газа?

Појасот Газа е мала енклава - која се граничи со Израел, Египет и Средоземното Море - каде што два милиона Палестинци живеат во пренаселени и сиромашни услови, а повеќето од нив се бегалци. Околу една деценија, Газа беше раководена од Палестинската управа, тело одговорно за ограничена палестинска самоуправа според мировните договори од Осло потпишани меѓу Израел и ПЛО. Во 2005 година, Израел ги повлече војниците од Газа и напушените израелски населби. На палестинските избори следната година, Хамас ја победи фракцијата Фатах на ПЛО, која раководеше со Палестинската управа. По неколкумесечни борби меѓу двете групи, Хамас ја презеде контролата врз Газа во 2007 година. Израел ја одржува контролата врз воздушниот простор и поморската територија на Газа и, заедно со Египет, долго време спроведува блокада на територијата.

7. Зошто има толку многу бегалци во Газа?

Многу од арапските бегалци од војната во 1948 година и нејзините последици побегнаа во Газа. Нивните потомци денеска се бројат како бегалци бидејќи за нив не е најдено трајно решение. Палестинците тврдат дека покрај илјадниците првични бегалци кои сè уште се живи, околу 5 милиони нивни потомци - во Газа, Западниот Брег и во странство - имаат „право на враќање“ во Израел. Израелските власти не се согласуваат. Тие се загрижени дека со таков прилив, во комбинација со речиси два милиона Арапи кои веќе се државјани на Израел, еврејското население во земјата (6,7 милиони) би можело да стане помалубројно, со што се губи целта за формирањето на еврејска држава.

8. Каква е ситуацијата на Западниот Брег?

Западниот Брег е дел од копното западно од реката Јордан каде живеат три милиони Палестинци. Во него живеат и околу 460.000 еврејски Израелци кои живеат во одделни населби. Некои Израелци тврдат дека Западниот Брег - кој тие го нарекуваат со библиското име, Јудеја и Самарија - е дел од историската татковина на Евреите и дека Израел треба да го анектира. Палестинската управа практикува ограничена автономија на Западниот Брег и Израел има целосна контрола таму, како што е наведено во договорите од Осло. Договорите требаше да воспостават привремени аранжмани додека двете страни преговараа за договор за конечниот статус, со кој се претпоставува дека би била основана палестинска држава, покрај Израел.

9. Што се случи со мировните преговори?

Двете страни не успеаја да ги решат прашањата што стојат на патот до договор за конечен статус, вклучително каде да се повлечат границите, како да се подели Ерусалим и статусот на палестинските бегалци. Последната рунда преговори пропадна во 2014 година.

10. Што е кибуц?

Неколку од градовите што ги таргетираа борците на Хамас беа израелски заедници наречени кибуци,  множина за кибуц, што значи собир. Феномен уникатен за Израел, кибуцот е колективна заедница, која обично се занимава со земјоделство. Првиот е основан во 1910 година, а денес ги има околу 250. Раните кибуци беа радикални експерименти на егалитаризмот, при што жителите ги здружуваа сите приходи и ги споделуваа рамноправно, ги јадеа сите оброци заедно, а понекогаш и ги воспитуваа своите деца во групни куќи. Денес, многу од кибуците ги имаат запоставено тие практики, но сè уште ги чувуваат елементите на заедничкото живеење.

11. Зошто САД го поддржуваат Израел?

По нападите на Хамас, САД преместија дополнителни воени бродови и авиони во регионот за да му покажат поддршка на својот сојузник и ветија дека Израел ќе го има потребното оружје и муниција додека се одвива конфликтот. Од Втората светска војна, Израел доби повеќе американска помош од која било друга земја - околу 158 милијарди долари помош и финансирање за ракетна одбрана. Во првите две децении по неговото создавање во 1948 година, Израел не беше особено близок сојузник на Америка. САД се зближија со Израел делумно како резултат на тактизирањата во Студената војна, бидејќи Советскиот Сојуз ги поддржуваше неговите арапски непријатели во 60-тите и 70-тите. До моментот кога СССР се распадна во 1991 година, односите меѓу САД и Израел развија нови основи. Израел ужива јавна поддршка во САД. Американските Евреи, кои добија глас со опаѓањето на антисемитизмот, очекуваат Конгресот и Белата куќа да стојат блиску до Израел. Истиот став го имаат и евангелските христијани, кои веруваат дека создавањето на Израел го претскажува второто Христово доаѓање. Нивната републиканска наклонетост ја направи поддршката за Израел - првично демократска кауза поради врските на Евреите со партијата и раната левичарска ориентација на Израел - двопартиска. Исламската револуција во Иран и нападите на исламистите врз цели на САД, вклучително и оние на 11 септември, исто така ги направија Американците нетрпеливи кон непријателите на Израел.

Во моментов нема коментари за веста. Биди прв да коментира...

Остави коментар