Хрватскиот гувернер за крипто: Кој ќе изгуби сè, нека не се жали

На вториот ден од 15. Weekend Media Festival (WMF), гувернерот на Хрватската народна банка (HNB), Борис Вујчиќ на панелот „Еден погрешен збор“ разговараше со нашиот Иван Врдољак за големата одговорност и деликатноста на неговата комуникација со јавноста, а се осврнаа и на бројни други теми.

Вујчиќ е отворено скептичен за пазарот на криптовалути и предупредува дека тој е само за коцкари бидејќи не постои институционална регулатива за заштита на инвеститорите. 

„Отсекогаш сум го имал истиот став за криптовалутите - ако сакате да инвестирате во овие средства, бидете подготвени да изгубите. Тоа во голема мерка е шпекулативен пазар, но на кого му се допаѓа, нека повели. Само, оние што ќе изгубат нека не доаѓаат кај нас да се жалат“, рече Вујчиќ и додаде дека наскоро централните банки веројатно ќе треба да издаваат свои дигитални валути, но тој ги гледа само како замена за готовина.

И покрај растечкиот бран на дигитализација, тој не се плаши од готовина. 

„Луѓето сè уште прават многу бизнис со готовина. Морам да понудам пари на пазарот врз основа на побарувачката - ако сакате готовина, ќе ви дадам готовина, ако сакате картичка, ќе ја добиете и неа. Но, ако бев министер за финансии, можеби ќе имав поинаков одговор“, нагласи хрватскиот гувернер.

Посочи дека секогаш мора да биде крајно внимателен и конкретен кога се обраќа на јавноста, а уште повнимателен кога се обраќа пред претставници на банки или власти. 

„Задачата е навистина одговорна, морам да ја балансирам комуникацијата за сите да бидат задоволни, а тоа е најтешкиот дел од мојата работа. Банкарите секогаш мислат дека сум многу строг кон нив. Тоа во суштина е точно, бидејќи барањата кои HNB им ги поставува се построги од оние во Европската унија. Но, тоа е затоа што главната улога на HNB е да ги заштити депозитите, односно оние кои чуваат пари во банките и да се погрижи банките да не пропаднат. Во суштина тоа е основната функција на HNB, а 90 отсто од луѓето тоа не го разбираат“, заклучи Вујчиќ.

Вториот ден од WMF донесе многу интересни панели и дискусии.

Иво Новак, глобален раководител за маркетинг за раст во Infobip, првиот хрватски еднорог, зборуваше за предизвиците со кои се соочува секојдневно во бизнисот, од персоналот до насоката во која ќе се развива рекламирањето во иднина.

Дури и tabula rasa може да заработи пристојни пари

Тој се осврна на веќе познатиот недостаток на програмери на пазарот, велејќи дека младите денес не знаат ни што можат да направат, па затоа е тешко да се заинтересираат. 

„Ќе го превртите секое дрво и камен и за некои од позициите има само 10 специјалисти. Но, за релативно кратко време можете да достигнете високо ниво на знаење - дури и tabula rasa кој има волја за учење може да конкурира за плата од 10.000 до 12.000 куни (н.з. 1.300 до 1.600 евра) за време од две до три години“, рече Новак и додаде дека промените што ги воведуваат компаниите мора да имаат „глава и опашка“ за да вродат со плод.

Сè додека има луѓе, ќе има вести

Телевизијата ќе опстане, но во соработка со современите технологии - беше заклучено на трибината „ТВ Маратонци“ на која присуствуваа најпознатите и најдолговечните лица од домашните мали екрани.

„Дневникот на телевизија е бизнис што изумира, но никогаш нема да умре, ќе умре кога ќе умре публиката. Денес има други платформи каде што може да се пласираат вести. Луѓето нè препознаваат по тој друг формат, децата почнуваат да ги гледаат нашите емисии. Јас лично се обидувам да создадам нова телевизиска публика преку социјалните мрежи. Мора да бидеме свесни дека читањето вести во 19 часот ќе згасне“, рече Зоран Шпрајц од RTL, изразувајќи го својот став за развојот на работите, а прогноза даде и Оливера Ковачевиќ од RTS. 

„Без разлика на ориентации и притисоци, мислам дека дневниците секогаш ќе се гледаат. Сè додека има луѓе, ќе има вести. Сè додека постои светот, ќе има интересни работи“, заклучи таа.

Во моментов нема коментари за веста. Биди прв да коментира...

Остави коментар