Словенија ќе увезува работници од Македонија

Недостигот од работници ги принудува работодавците од Словенија да бараат работна сила надвор од нивната земја. Ако во минатото најмногу работници од земјите од регионот Адрија се носеа во градежништвото, сега сликата значително се менува. Има се поголем недостиг од работна сила во здравството и преработувачката индустрија.

Затоа Заводот за вработување работници, кои речиси е невозможно да се најдат во Словенија, активно бара луѓе во земјите од поранешна Југославија. Изминатава  недела, во различни градови на Босна и Херцеговина (БиХ) се одржаа презентации на Словенија и словенечки работодавци, а околу 50 компании бараа нови работници.

Како што информираат од Заводот, главната цел на настанот е да се презентираат актуелните потреби на работодавачите, а во исто време на странските баратели на работа да им се обезбедат веродостојни информации за работата и животот во Словенија.

Во исто време, работниците се поканети во Словенија на различни начини. За оние кои се заинтересирани за работа, во информативниот флаер се наведени некои од поважните аспекти на работата и животот во Словенија. Меѓудругото, се вели дека работата е 40 часа неделно, а работодавачот мора да го пријави работникот за здравствено и пензиско осигурување.

„Стандардната кирија за гарсониера во Љубљана е помеѓу 400 и 500 евра, а за двособен стан меѓу 700 и 800 евра. Во повеќето други места во Словенија, киријата за станови е за околу 20 отсто помала“, пишува во флаерот.

Истовремено, се наведуваат некои статистички податоци, кои, според тврдењата на Заводот, очигледно се интересни за барателите на работа. Меѓудругото, дека просечната цена на црното кафе е 1,48 евра, дека килограм јаболка е 1,51 евро, а килограм сирење 11,12 евра.

Како што велат од Заводот за „Блумберг Адрија“, тоа е стандарден сет на податоци што се користи за прикажување на условите за живеење и работа во одредени земји (во рамките на мрежата „Еурес“ (Eures).

Првиот од четирите настани за презентација на работодавачите се одржа во понеделникот во Сараево, а вториот во вторникот во Зеница. Потоа дојде на ред  Бања Лука, па Тузла.

„На настаните се претставени околу 50 работодавачи од различни индустрии и региони во Словенија. Има групни презентации каде даваме информации за условите за живеење и работа во Словенија, условите и процедурите за ангажирање странци, за еднаквите права и третманот на домашните работници.“, велат од Заводот.

Интерес за учество на настаните пројавиле вкупно околу 50 работодавачи. Најголем дел од нив се големи и средни компании, кои заедно вработуваат над 34.000 работници, а лани во Заводот биле пријавени над 8.100 слободни работни места.

На словенечкиот пазар на труд има побарувачка за кадри кои одамна недостигаат. Доминантни работодавачи се од областа на: здравствена и социјална заштита, доктори од различни специјалности (семејна медицина, трудова медицина, педијатрија), медицински персонал (медицински сестри, асистенти), кујнски персонал (готвач, помошник во кујна) и технички персонал (персонал за одржување) .

Има и производствени активности (меѓу другите „Радече Папир Нова“, „Словенска индустрија чекла“, „Униор“, „Шумида Словенија“), а најбарани се ѕидарите, столарите, транспортните и магацинските работници.

Се бараат различни возачи, на пример за автобуси, камиони, вилушкари, како и работници за угостителство („Хотел Палас Порторож“), келнери и готвачи.

Заводот за вработување на Словенија со учество на меѓународни саеми и независни презентации, кои се планираат наскоро и во Македонија, ќе се обиде да обезбеди работници и за реконструктивни работи по поплавите. Оттаму нагласуваат дека законот донесен во август ќе овозможи побрзо вработување на странски работници кои ќе помогнат да се отстранат последиците од поплавите и одроните.

Според проценките на надлежните, санирањето на штетите од августовските поплави ќе трае долго, а се уште не е целосно познато на колку работодавачи им се потребни работници, рече в.д. генералниот директор на Заводот за вработување Грета Метка Барбо Шкербинц за „Блумберг Адрија“.

Заводот ги следи потребите на работодавачите кои бараат или ќе бараат дополнителни работници во наредните недели и месеци за да извршат реконструкција по поплавите.

На презентацијата посебен акцент ќе биде ставен на законодавните и на други информации од областа на вработувањето и работата на странците, за условите за работа и живот во Словенија, како и на помошта што може да ја понуди словенечкиот Завод.

Поради големиот недостиг на кадри и многубројните активности на полето на вработување на странци, тие, како што додаваат, во иднина уште поактивно ќе се залагаат за обезбедување поддршка за вработување на печалбарите и работодавачите кои вработуваат странски работници.

 

 

Во моментов нема коментари за веста. Биди прв да коментира...

Остави коментар