Доцна синоќа американскиот претседател Доналд Трамп изјави дека води „жешки преговори“ поврзани со војната со Иран, откако посредникот Пакистан побара двонеделно продолжување на рокот за Техеран да го отвори Ормускиот теснец. Коментарите дојдоа кратко откако пакистанскиот премиер Шехбаз Шариф на социјалните мрежи објави дека разговорите „напредуваат стабилно, силно и решително“ и дека неговата земја побарала од Иран „да го отвори Ормускиот теснец за соодветен период од две недели како гест на добра волја“.
Добро утро, ви пишува Анита С. Буховски од дигиталната редакција на „Блумберг Адрија“. Во продолжение се петте вести што ги издвоиме за почеток на денот.
Македонија пред искушенија: Инфлацијата забрза, а нафтениот шок може допрва да ја зголемува
Стапката на инфлација во Македонија во март изнесувала 4,9 проценти, што е значително забрзување во однос на претходниот месец кога таа изнесуваше 2,9 проценти. Податоците на Државниот завод за статистика откриваат дека во март годинава поскапувања имало кај сите групи производи и услуги.
За забележување е што растот на трошоците на животот се уште не ги вклучува целосно ефектите од потресите на нафтениот пазар предизвикани од нападите на САД и Израел на Иран на крајот на феруари и затворањето на Ормускиот Теснец, кои што доведоа до поскапување на нафтените деривати и во Македонија. Имено, доколку војната на Блискиот Исток се пролонгира извесно е дека нафтената криза ќе влијае врз дополнително зголемување на трошоците на животот односно дека нашата земја ќе се соочи со нов инфлаторен вител.
Суровините поскапуваат, растат трошоците на македонската индустрија
Цената на алуминиумот минатата недела се искачи на највисоко ниво во последните четири години. Причина за растот беше нападот со ирански ракети и дронови врз најголемиот производител на металот на Блискиот Исток од Абу Даби. По ова, напад пријави и производител на алуминиум од Бахреин.
Блискиот Исток во целина произведува околу 9 отсто од глобалната понуда на алуминиум и игра клучна улога во снабдувањето на пазарите во Европа, Азија и САД. Дури и пред овие производители на бидат погодени од иранските сили, затворањето на Ормускиот Теснец предизвика проблеми за производителите што останаа без критичните суровини.
Американските обврзници паднаа додека војната во Иран ги крева цените на нафтата
Државните обврзници на САД паднаа поради растот на цените на нафтата во пресрет на рокот што претседателот Доналд Трамп му го постави на Иран да ги прифати условите за прекин на американските напади доцна во вторникот. Падот ги зголеми приносите за до пет базични поени, при што најмногу пораснаа приносите кај долгорочните обврзници, а десетгодишните и триесетгодишните достигнаа највисоки нивоа во текот на сесијата, во услови на спротивставени сигнали дали заканите на Трамп за масовно разорување навистина ќе се реализираат.
„Растот на приносите сигнализира дека загриженоста за инфлацијата се засилува“, изјави Шон Симко, директор за управување со инвестиции со фиксен принос во „СЕИ“ (SEI Investments Corp.).
Кина и Русија ставија вето на резолуцијата на Советот за безбедност за Ормускиот теснец
Русија и Кина ставија вето на резолуција на Советот за безбедност на Обединетите нации, која требаше да ги поттикне земјите да ги координираат одбранбените напори за повторно отворање на Ормускиот теснец, поради загриженост дека индиректно ќе се одобри воена акција во водниот пат.
Резолуцијата доби 11 гласа „за“, но не помина бидејќи Русија и Кина — како постојани членки со право на вето — беа против. Гласањето следеше по неколкудневни преговори и притисок од повеќе земји од Заливот за враќање на слободниот проток низ теснецот.
Вреди ли „Спејс екс“ два билиона долари? Клучни прашања за големото ИПО на Маск
Седум и пол години откако пазарната капитализација на компанијата „Епл“ (Apple Inc.) ја надмина границата од еден билион долари, инвеститорите се навикнати големите технолошки компании на јавните пазари да достигнуваат 13-цифрени вредности.
Тој тренд ќе продолжи. „Спејс екс“ (SpaceX), компанија за истражување на вселената под контрола на основачот на „Тесла“ (Tesla Inc.) и најбогат човек на светот Илон Маск, најави дека планира огромна иницијална јавна понуда (ИПО/IPO) во наредните месеци. Конкурентите во областа на вештачката интелигенција „Опен еј-ај“ (OpenAI) и „Антропик“ (Anthropic) исто така би можеле да излезат на берза оваа година, а нивните приватни процени веќе достигнаа стотици милијарди долари.
.webp){kind=icon}
