Коосновачот на пропаднатата криптоберза FTX, Сем Банкмен-Фрид, формално поднесе барање за претседателско помилување, повеќе од две години откако беше осуден поради колапсот на неговата некогаш успешна криптоимперија, тежок повеќе милијарди долари.
34-годишниот Банкмен-Фрид поднел барање до Канцеларијата на обвинителот за помилувања при Министерството за правда, според веб-страницата на таа служба.
Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.
Колку заработија македонските фондови?
Шесте друштва што управуваат инвестициски фондови во Македонија лани имале вкупни приходи за 39,2 отсто поголеми во однос на оние од 2024 година, односно 602,9 милиони денари (околу 9,8 милиони евра). Речиси 91 отсто од приходите се од управување, влезен и излезен надоместок и други приходи. Околу 6,5 отсто се приходи од управување со портфолио, и три отсто се други приходи (инвестициско советување, нето-приходи од камата, итн.)
Деталниот извештај за работата на инвестициските фондови во 2025 на Комисијата за хартии од вредност (КХВ) покажува дека пет друштва за управување со фондови ја завршиле 2025 со добивка, само друштвото „Опфолио Инвестиции“ коешто почна со работа во мај 2025, годината ја заврши со негативен резултат – загуба.
Вкупниот износ на остварена добивка на овие пет друштва е 221,6 милиони денари (3,6 милиони евра) и е за 38,5 отсто поголема од добивката на истите пет друштва во 2024. Раст на добивката за една година има кај „Вега Фондови“ (125,8 отсто), „НЛБ Фондови“ (69,9 отсто), „КБ Инвест“ (52,4 отсто) и „ВФП Фонд Менаџмент“ (6,8%), додека кај друштвото „Иново Статус“ има намалување од 50 отсто на добивката во однос на претходната година.
Дивидендни кралеви
Освен дивидендните аристократи - компании кои најмалку 25 години последователно ги зголемуваат дивидендите - на американскиот пазар постои уште поексклузивен клуб. Станува збор за дивидендните кралеви (Dividend Kings), компании кои успеале да ја зголемуваат дивидендата најмалку 50 години по ред, минувајќи низ рецесии, инфлациски шокови, берзански крахови и бројни економски циклуси.
Таков континуитет е исклучително тешко да се постигне. За една компанија да стекне статус на дивидендeн крал, не е доволно само да исплаќа дивиденда или повремено да ја зголемува. Исплатата мора да расте секоја година, без прекин, во текот на најмалку половина век. Денес во САД постојат едвај педесетина компании кои го исполнуваат тој критериум, а меѓу нив се фирми што успешно ги пребродиле нафтените кризи од седумдесеттите години, дот-ком крахот, глобалната финансиска криза од 2008 година, пандемијата и периодот на висока инфлација.
Дресовите како маркетиншко оружје
Додека одбројувањето до почетокот на Светското првенство во фудбал влегува во завршна фаза, а 48 репрезентации се подготвуваат за најголемиот турнир досега што ќе се одржи во САД, Канада и Мексико, во сенка на теренот се води уште еден еднакво интензивен натпревар. Тоа е бескрајното ривалство меѓу двата гиганта во спортската опрема – „Најк“ (Nike) и „Адидас“ (Adidas).
Со потенцијална публика од речиси пет милијарди гледачи, Светското првенство не е само спортски настан туку и најважниот маркетиншки полигон во светот, место каде што брендовите се борат за глобално внимание, влијание и лојалност на потрошувачите.
Големата тројка „Адидас“, „Најк“ и „Пума“ (Puma) и овој пат доминираат, обезбедувајќи опрема за 37 репрезентации што настапуваат на Светското првенство, што претставува 75 отсто од пазарот.
Таксата од 100.000 долари за американска виза падна на суд
Федерален судија ја поништи таксата од 100.000 долари што претседателот Доналд Трамп ја наложи за барања за виза Х-1Б (H-1B), обезбедувајќи олеснување за американските технолошки компании кои се потпираат на вработување квалификувани странски работници.
Уредбата на претседателот со која драматично се зголемува цената на популарната виза е незаконски данок и мора да се поништи, изјави американскиот окружен судија Лео Т. Сорокин во Масачусетс во понеделникот. Владата веројатно ќе се жали на одлуката, што е удар за кампањата на администрацијата на Трамп за ограничување на имиграцијата и зголемување на побарувачката за американски работници.
Сорокин застана на страната на Калифорнија и 19 други сојузни држави кои поднесоа тужба за блокирање на таксата, согласувајќи се дека Трамп нема овластување да ја наметне високата давачка без одобрение од Конгресот.
САД бараат сојузниците во НАТО да ја отстранат опремата од „Хуавеј“
Администрацијата на претседателот Доналд Трамп ги повика сојузниците во НАТО да го насочат трошењето за одбрана кон замена на компонентите од кинеската „Хуавеј“ во нивните мрежи и критична инфраструктура, според лица запознаени со прашањето.
Американската влада одамна го смета „Хуавеј“ и другите кинески добавувачи за ризик по националната безбедност и ги исклучи од американските мрежи. Сега функционери од администрацијата на Трамп ги повикуваат сојузниците во НАТО да го направат истото.
Координаторот на Стејт Департментот за Кина, Џошуа Јанг, минатиот месец им кажал на службеници во Брисел дека треба да го користат буџетот за одбрана за да ја отстранат опремата на „Хуавеј“ и да ја заменат со производи од други добавувачи, рекле лицата под услов на анонимност бидејќи разговорите биле зад затворени врати.
Како да купите крипто?
Криптото повеќе не е резервирано само за експерти. Денес постојат неколку едноставни начини за пристап до пазарот. Еден од начините за купување крипто денес е преку финтек-сервиси базирани на блокчејн-технологија.
Дознајте како функционираат криптопазарите, блокчејнот и дигиталните средства преку Блумберг Адрија Крипто едукација. ДОЗНАЈТЕ ПОВЕЌЕ.
.webp){kind=icon}
