Изгледа никој не сака трговска војна - пет вести на денот

САД и Кина постигнаа „значаен напредок“ по дводневните разговори во Швајцарија со цел деескалација на трговската војна, изјавија во неделата министерот за финансии Скот Бесент и трговскиот претставник на САД, Џејмисон Грир. Според Грир, важно е да се разбере колку брзо бил постигнат договор, што покажува дека можеби разликите не биле толку големи колку што се мислело. Двајцата најавија дека денеска ќе откријат повеќе детали за договореното.

Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.

Што очекуваат менаџерите на најголемите компании во Македонија и регионот Адрија до крајот на годината?

Во време обележано со тарифи, војни, силни геополитички промени и нова економска парадигма, тешко е со сигурност да се предвиди „мед и млеко“ за глобалната економија. Повеќето релевантни економски институции - Светската банка, ММФ, Европската комисија и водечките инвестициски банки - ги намалија своите прогнози за раст на светските економии за оваа година, токму поради екстремната неизвесност.

Регионот Адрија не е исклучен од овие глобални притисоци, но во последните неколку години покажа поголема отпорност на надворешни шокови. За тоа придонесоа силниот прилив на странски директни инвестиции и недостигот од работна сила, што го стимулираше растот на реалните плати, а со тоа и потрошувачката, што е главен двигател на растот на БДП во регионот.

Различни проекции за БДП - има ли простор за оптимизам?

Светска банка смета дека македонската економија годинава ќе забави и нема да ги достигне ни ланските 2,8 отсто раст. Според последните проекции на банката, БДП годинава ќе порасне само 2,6 отсто. Минатогодишниот раст, според оваа проекција земјава ќе го достигне дури во 2027 година.

Владата пак смета дека годинава растот ќе се врати на нивото од пред пандемијата и ќе стигне до 3,7 отсто. За до 2027 година, владиниот оптимизам го крева растот до 5 отсто до 2028 година, стапка која земјава не ја достигнала во 20 години (од периодот од 2006 до 2008 година). Меѓу овие две крајности се проекциите на Народната банка за раст на БДП од 3,3 отсто во оваа 2025 година, ММФ проектира раст од 3,2 отсто. Слична е проекцијата на аналитичкиот тим на „Блумберг Адрија“. Нашите аналитичари сметаат дека земјава оваа година ќе забележи економски раст од 3 отсто, иста е и прокецијата на ЕБОР.

Судија пресуди дека Трамп мора да ги запре масовните отпуштања на федералните работници

Администрацијата на Трамп мора привремено да престане да се занимава со широко распространети отпуштања на владини службеници, пресуди федералниот суд во Калифорнија во петокот. Февруарската извршна наредба на претседателот Доналд Трамп, која повикува на радикална реорганизација на федералната работна сила, веројатно го крши Уставот, изјави судијката Сузан Илстон од Окружниот суд на САД за Северниот округ на Калифорнија.

Таа одобри привремена забрана за спроведување на одлуката побарана од коалицијата на синдикати, непрофитни организации и општински самоуправи, за да се запрат отпуштањата на работници низ целата земја.Пресудата е најголемиот удар досега врз напорите на претседателот да ја намали федералната влада со намалување на трошоците и намалување на она што се смета за административно преоптоварување.

Преглед на пазарите: Фед му пркоси на Трамп, европските индекси ги надминаа американските

Федералните резерви на САД одлучија да ги остават каматните стапки непроменети во опсег од 4,25 до 4,5 проценти на состанокот во средата, одлука што веројатно го разочара претседателот Доналд Трамп, кој долго време се залага за пониски каматни стапки.

Одлуката беше оправдана со ризиците од поголема невработеност и повисока инфлација, за кои се очекува да се зголемат. Дури и пред одлуката, објавивме дека претставници на Федералните резерви во неодамнешните јавни коментари нагласија дека иако неизвесноста е невообичаено висока, монетарната политика е сè уште во добра позиција за да ги балансира своите цели за промовирање максимална вработеност и стабилни цени.

Папата Лав XIV ја идентификува вештачката интелигенција како голем предизвик за човештвото

Папата Лав XIV во саботата ја изложи визијата за своето папство, идентификувајќи ја вештачката интелигенција како едно од најкритичните прашања со кои се соочува човештвото и ветувајќи дека ќе продолжи со некои од основните приоритети на папата Франциск. Но, како знак дека го прави папството по свој терк, Лав го одржа својот прв настап по неговиот избор во светилиште јужно од Рим кое е посветено на Мадона и е од особено значење за неговиот августински ред и неговиот истоимен, папата Лав XIII.

Граѓаните на Џенацано се собраа на плоштадот пред главната црква каде што се наоѓа светилиштето Madre del Buon Consiglio (Мајка на добриот совет) кога Лав пристигна и ги поздрави. Светилиштето, кое го управуваат августинските монаси, е место за поклонение од 15 век, а претходниот папа Лав го воздигна во мала базилика и го прошири соседниот манастир на почетокот на 1900-тите.