Трговците со криптовалути забележаа ликвидација на повеќе од 1,5 милијарда долари. Наглата распродажба доведе до остар пад што најмногу ги погоди помалите токени. Етерот падна дури за девет проценти, на 4.075 долари, а вредноста на биткоинот падна за речиси три проценти, на 111.998 долари.
Добро утро, ова се петте вести што се важни за почеток на денот.
Колку се збогатија Македонците што инвестираа во злато?
Цената на златото вчера достигна нов рекорд од 3.721 долари (3,160 евра) за унца во услови на растечки оптимизам за изгледите за монетарната политика на САД додека инвеститорите го очекуваат клучниот инфлациски извештај што може да им даде простор на креаторите на политиките за пониски стапки. Со тоа златото го надмина рекордот поставен минатата недела откако Федералните резерви (Фед) ги намалија стапките за првпат од декември. Пониските стапки им користат на благородните метали коишто не носат камата.
Цената на златото урива рекорди веќе подолг период, а главно поради геополитичките тензии и царинските политики на САД коишто носат неизвесност во глобалната економија и ги тераат инвеститорите да бараат засолниште во овој скапоцен метал. Тие што вложија во злато имаат причина да бидат задоволни. Тоа го покажа нашата пресметка на реалните приноси на инвестициите во злато за периодот 2023-2024 година.
ЕУ почнува со инстант банкарските плаќања, во Македонија ќе почекаме уште една година
Од следниот месец во земјите на ЕУ нема повеќе да има чекање вашата уплата преку банка да легне на сметката на примачот за два дена доколку е направена во петок попладне – плаќањата ќе бидат брзи, во рок од десет секунди, независно во кое време на работен ден, викенд или празник. Со тоа конечно ќе заживее во целост европската уредба за платежни услуги донесена во 2023 година. Со оваа услуга дополнително се поставува рамката за модерни плаќања и се нагласува важноста на оваа услуга за граѓаните и компаниите.
Македонските граѓани и компании, пак, ќе почекаат уште некое време за оваа привилегија, веројатно уште една година. Како што ни рекоа од Народната банка, таму веќе подолго време работат на модернизација на националната платежна инфраструктура, вклучувајќи и воведување на инстант плаќањата, во тесна соработка со банките и во согласност со европските стандарди и најдобрите практики на Европската централна банка.
Алгоритамот на Тикток ќе биде под целосна контрола на „Оракл“ во САД
„Оракл“ (Oracle Corp.) ќе креира нова американска верзија на алгоритамот на Тикток (TikTok) и ќе обезбеди нејзина заштита, во рамките на договорот што се подготвува за продажба на популарната апликација во сопственост на Кина на конзорциум од американски инвеститори, изјави официјален претставник на Белата куќа, осврнувајќи се на загриженоста на американските законодавци во Вашингтон.
Договорот, претставен во соопштение во понеделникот, има цел да гарантира дека американските купувачи ќе го контролираат алгоритамот на Тикток во САД по раздвојувањето од кинеската матична компанија „Бајтденс“ (ByteDance Ltd.). Сопствениците на американската верзија на Тикток ќе изнајмат копија од алгоритамот од „Бајтденс“, кој „Оракл“ потоа ќе го развива „од нула“, посочува истиот извор.
„Алибаба“ сака дел од брендовите од „Амазон“ да донесе на „Али експрес“
„Алибаба груп холдинг“ (Alibaba Group Holding Ltd.) се обидува да привлече познати брендови од „Амазон“ (Amazon.com Inc.) на својата глобална е-трговска платформа „Али експрес“ (AliExpress), засилувајќи ги напорите за проширување на своето присуство на американскиот пазар.
Според добро упатени извори, „Али експрес“, онлајн порталот на „Алибаба“ за пазари надвор од Кина, се обидува да додаде уште повеќе големи брендови со тоа што ветува пониски трошоци за испорака и прифаќа да зема помал процент од продажбата отколку што прави „Амазон“.
„Пинкфонг“, креаторот на „Бејби шарк“, сака да собере 55 милиони долари преку ИПО во Сеул
Компанијата што стои зад „Бејби шарк“ (Baby Shark), најгледаното видео на Јутјуб на сите времиња, се стреми да собере дури 76 милијарди вони (54,6 милиони долари) преку иницијална јавна понуда (ИПО) во Сеул.
Јужнокорејската „Пинкфонг“ (Pinkfong Co.) планира да издаде два милиони нови акции по цена од 32.000 до 38.000 вони (23-27,3 долари) по акција, според проспектот поднесен денеска. На врвот на ценовниот опсег, договорот ѝ дава на компанијата пазарна вредност од околу 545 милијарди вони (391,6 милион долари), покажуваат пресметките на „Блумберг“.
.webp){kind=icon}
Во моментов нема коментари за веста. Биди прв да коментира...