Цените на среброто во 2025 година достигнаа невидени нивоа, растејќи со брзина што не се памети во поновата историја. По октомври, кога цената за унца премина 54 долари, белиот благороден метал брзо надмина и 57 долари, двојно зголемувајќи ја својата вредност во однос на почетокот на годината. За разлика од златото, кое традиционално се смета за најсигурно засолниште во турбулентни времиња, среброто сега води своја битка - поддржана од инвестициски, но и индустриски фактори. Неговата повеќекратна примена во различни растечки индустрии е клучен адут за неговиот раст, што го прави металот да „лета“, додека златото стагнира.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Продолжува шринкфлацијата – и скриените поскапувања ги нервираат Македонците
Ви се чини дека ѓевречето што го купувате секојдневно во локалната пекарница некако станува сѐ помало? Исто така и парчето од омилената торта што редовно ја нарачувате за десерт. Не грижете се, не ве лажат сетилата, туку ве погодила шринкфлацијата – добивате помалку за истите пари, а неретко и за повисока цена. Оваа „скриена“ инфлација, покрај таа „очигледната“ што си ја имаме, ја практикуваат сите бизниси, и големи и мали, од светски корпорации до локални занаетчии.
Мој близок пријател се колне дека дури и фармерките од кои постојано купува ист број во еден скопски бутик во последно време му се потесни во нозете. „Штедат на материјал, а не дека јас сум се здебелил“, вели тој. Феноменот „шринкфлација“ е всушност кованица од англиските зборови „shrink“ (нешто да се смали, да се стесни) и „inflation“ (инфлација). Иако шринкфлацијата е практика стара со векови, не била отсекогаш нарекувана со тој термин, туку се смета дека кованицата е креирана во 2009 година од страна на британската економистка Пипа Малмгрен.
Нема поголема продуктивност без јасни цели и стратегии
Наталитетот паѓа, иселувањето расте – во вакви услови прв страда пазарот на трудот. Зголемувањето на продуктивноста е еден од најголемите предизвици со кои се соочуваат компаниите во земјава, особено малите и средните претпријатија. Кои се замките во кои паѓаат и менаџерите и работниците кога станува збор за продуктивноста и што е неопходно за таа да се зголеми беше темата на панел-дискусијата „Not so small talks“ што неодамна ја организираше „Блумберг Адрија“ во Скопје.
Оваа активност беше поддржана во рамките на Швајцарскиот проект за модернизација што го спроведува „Свисконтакт“. Искажаната содржина не смее да се смета дека ги одразува ставовите на донаторот и спроведувачот. Бизнис-советниците на панелот се согласија дека не постои волшебно апче што ќе го реши проблемот, туку дека за зголемување на продуктивноста е потребно да постои синергија меѓу опремата, процесите и луѓето.
Од џепарлак до портфолио: Како младите може да ја обликуваат иднината преку рано инвестирање
Голем број студенти имаа ретка можност да слушнат како преку долгорочно инвестирање во акции и други финансиски инструменти може да обезбедат поголема финансиска стабилност во иднината и да разберат колку е важно правилно да се управува со личните финансии во рамките на настанот „Од џепарлак до портфолио“ што неодамна се одржа на Економскиот факултет при УКИМ во Скопје. Настанот го организираа „Блумберг Адрија“, Македонската берза и Економскиот факултет при УКИМ, а беше поддржан од „Шпаркасе банка“.
Михаел Блажековиќ, главен аналитичар во „Блумберг Адрија“ зборуваше за тоа што треба секој млад човек да знае за инвестирањето, како на долгорочен план може да се креира финансиска стабилност и какво е значењето на диверзификацијата на инвестициите.„Сите сме свесни дека живееме во свет полн со геополитички тензии, трговски бариери, војни и нестабилност на финансиските пазари. При толку многу несигурност, лесно е да се испаничи и да се реагира емоционално. Од друга страна, главниот принцип на долгорочното инвестирање е ‚останете долго, и игнорирајте ја краткорочната галама‘ бидејќи времето работи за вас“, рече Блажековиќ.
Како изгледа длабокотехнолошката индустрија во регионот Адрија
Што е длабока технологија (deep-tech)? Станува збор за технологии базирани на научни и инженерски способности: роботика, напреден хардвер, биотехнологија, материјали, дронови и системи на висока технологија. Овие проекти бараат време, експертиза и значителни ресурси, но можат да променат индустрии и да обезбедат стратегиска предност на пазарите што ги развиваат.
Накратко кажано, ако има лабораторија, прототипи и фундаментална наука, тоа е длабока технологија. Ако е само софтвер што се продава брзо и лесно на глобално ниво, тоа не е. Според анализа на „Мекинзи“ (McKinsey & Company), ако Европа успее да изгради одржлив екосистем за длабока технологија, овој сектор до 2030 година би можел да додаде вредност од дури еден билион долари и да создаде до еден милион нови работни места.
Култни филмски автомобили распродадени на аукција за 2,4 милиона евра
Во светот на колекционерските автомобили, аукциите секогаш привлекуваат внимание, а особено кога ги комбинираат гламурот на Холивуд и можноста за сериозен финансиски потфат. Тоа се покажа и на онлајн продажбата на култни филмски автомобили и мотоцикли што беше организирана од аукциската куќа „Бонамс“ (Bonhams), со промет од 2,4 милиони евра.
Понудата беше импресивна и разновидна, вклучувајќи 50 автомобили што одиграа клучни улоги во холивудските блокбастери, франшизи и европски хитови, како и 19 дополнителни филмски меморабилии. Меѓународните колекционери особено се интересираа за оригиналните возила користени во филмовите „Луѓе во црно“ (Men in Black), „Враќање во иднината“ (Back to the Future), „Робокап“ (Robocop) и „Истерувачи на духови“ (Ghostbusters), како и висококвалитетни реплики од „Бетмен“ и серијалот за легендарниот Џејмс Бонд.
.webp){kind=icon}
