Жената која самата себе се нарекува европска „Госпоѓа Криза“ ја приведува кон крај својата кариера во речиси целосно променети околности во однос на светот каков што го познавала.
Дваесет години по влегувањето во јавната служба, претседателката на Европската централна банка (ЕЦБ), Кристин Лагард, може да се пофали со стабилна инфлација и релативно отпорен економски раст. Сепак, ја загрижуваат растот на популизмот и обидите на Европа да се снајде во глобалната геополитичка игра.
На 39-тиот кат од зградата на ЕЦБ во Франкфурт, Лагард зборува за тоа како нееднаквоста придонесува за зајакнување на поддршката за екстремни политички опции, додека бавното донесување одлуки ѝ отежнува на Европа да ја обликува сопствената судбина.
Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.
Како стареењето на Македонците може да влијае врз каматите?
До кога ќе можат централните банки да ги користат референтните каматни стапки за да ја креираат монетарната политика е прашање што неодамна го зачна Светскиот економски форум (СЕФ) од каде што алармираа дека стареењето на населението претставува растечки предизвик за ефикасно користење на овие алатки. Оттаму укажаа дека се очекува уделот на населението на возраст од 65 години или повеќе речиси да се удвои до 2054 година.
Со оглед на тоа што нашата земја исто така се соочува со демографско стареење, а Народната банка редовно ја користи каматата на благајничките записи за да влијае на економијата, анализираме на што се должи предупредувањето од Светскиот економски форум.
Која е скриената цена на работа од далечина?
Работата оддома, која стана нешто сосема нормално по ковид-пандемијата што ја донесе како нужност за голем дел од вработените, долго време се промовираше како симбол на флексибилност, подобар баланс и поголема автономија. Но, искуствата на некои професионалци кои со месеци, па и со години работат од далечина, покажуваат поинаква слика: работниот ден станува подолг, границите меѓу приватното и професионалното се намалуваат, а чувството на постојана достапност станува новата норма.
Анкета меѓу вработени кои работат од далечина, дел од нив повеќе од една година, а некои и повеќе од три години, укажува дека првичниот ентузијазам, „супер, ќе работам од дома по пижами“ постепено се претвора во хроничен замор, психолошка напнатост и чувство дека домот се претвора во канцеларија која е постојано отворена.
Психолозите предупредуваат дека овие промени не се индивидуален проблем, туку последица од модел на работа кој, без јасни правила и граници, може да има сериозни последици врз менталното здравје.
Како ќе се движат цените на бакарот, алуминиумот и железото во 2026 година?
Перспективите за 2026 година укажуваат на продолжување на позитивните трендови и за бакарот и за алуминиумот, поткрепени од нивната клучна улога во енергетската транзиција, електрификацијата и проширување на инфраструктурата за обновлива енергија, посочуваат од аналитичкиот тим на „Блумберг Адрија“. Се очекува побарувачката да остане силна, додека ограничувањата на понудата веројатно ќе продолжат, одржувајќи притисок врз цените нагоре, иако периоди на зголемена нестабилност не можат да се исклучат по силните перформанси во 2025 година.
Се очекува железната руда да се соочи со поблаги перспективи во 2026 година, поттикнати од зголемената понуда од нови проекти и придушеното закрепнување на кинеската побарувачка, додека растот на инфраструктурата на пазарите во развој обезбедува само делумна поддршка.
Нови рекорди во новата година
Берзите влегоа во новата година со нова енергија. Американскиот индекс S&P 500 во петокoт се искачи на нови врвови и оствари неделна добивка по објавувањето на најновиот извештај за работни места во САД.
Сите три главни американски индекси ја завршија минатата неделата со раст. S&P 500 забележа раст од повеќе од еден процент, додека Dow Jones и Nasdaq се зголемија за 2,3, односно 1,9 проценти.
Европскиот берзански индекс STOXX Europe 600 исто така го заврши тргувањето во петокот со 2,27 проценти повисоко од почетокот на неделата и достигна нов рекорд - 609,67 поени.
Азија е нов центар на глобалната технолошка револуција
Технолошките акции во Азија започнаа силно во 2026 година, а инвеститорите се надеваат дека нивниот импулс и надмоќност во однос на американските конкуренти ќе траат цела година.
Стратезите на Goldman Sachs Group Inc. имаат препорачано поголема изложеност и очекуваат дополнителни добивки, делумно поттикнати од растечката побарувачка поврзана со вештачката интелигенција и разумните вредности на акциите. Citigroup Inc. наведува дека глобалните долгогодишни инвеститори купуваат азиски технолошки акции, имајќи ја предвид нивната улога во синџирот на снабдување со полупроводници и потенцијалот за зголемување на профитот.
Клучниот индекс за азиските технолошки акции порасна околу 6 отсто досега оваа година, надминувајќи го порастот од 2 отсто на Nasdaq 100, додека инвеститорите се префрлаат кон регионот кој е во срцето на глобалниот синџир за снабдување со полупроводници. Оваа промена ги одразува растечките сомнежи дека американската технологија може да го одржи својот раст поттикнат од вештачка интелигенција по години на извонредни добивки.
.webp){kind=icon}
