Нема да се појави лично, а неговото видеообраќање ќе се случи на завршницата од Светскиот економски форум. Но Доналд Трамп сè уште е главна тема за разговор во Давос.
Приврзаниците како аргентинскиот претседател Хавиер Милеј се возбудени. Украинскиот Володимир Зеленски гледа со надеж кон својот нов американски колега. Целите на Трамп, како германскиот канцелар Олаф Шолц, се држат настрана.
Речиси секој разговор во ова швајцарско планинско одморалиште содржи процена за плановите на новиот претседател.
„Ако не ја разберете играта што ја игра Трамп, тешко ќе ја разберете неговата визија“, изјави Милеј за главниот уредник на „Блумберг“ (Bloomberg), Џон Миклтвејт, во средата во Блумберг хаус (Bloomberg House). „Насоките што ги поставува ќе создадат многу подобар свет“.
Како либертаријански пурист и прв странски лидер што го сретна Трамп по неговата изборна победа, Милеј не гледа конфликт меѓу неговите ставови за слободна трговија и љубовта на Трамп кон тарифите. „Не е дека тој е протекционист, туку знае каква улога има САД во светот и, соодветно на тоа, неговата комерцијална политика е дел од неговата геополитичка стратегија“, додаде Милеј.
Хавиер Милеј
Bloomberg
Други лидери не беа толку ентузијастички расположени, но покажаа дека се подготвени да играат според правилата на Трамп.
„Слушајте што има да каже претседателот Трамп и дејствувајте соодветно“, истакна финскиот претседател Александар Стуб во интервју. „Земја како Финска сигурно ќе го направи тоа“.
Некои беа посмешни. „Ако играњето голф може да донесе корист за мојата земја и мојот народ, тогаш можам да играм голф цел ден“, рече виетнамскиот премиер Фам Мин Чин, предизвикувајќи смеа кај публиката.
Многу нешта се променија во текот на една година. Лани во јануари, кога Франсин Лаква од телевизијата „Блумберг“ ја праша претседателката на Европската централна банка (ЕЦБ), Кристин Лагард, за можноста Трамп повторно да се врати во Белата куќа, таа на шега рече дека ѝ треба уште една шолја кафе пред да одговори на прашањето.
Публиката тогаш се смееше. Но сега никој не се смее.
Група лидери од еврозоната неделава ги заменија критиките од минатото со повици за соработка.
„Мора да пристапиме конструктивно во нашите односи со новата администрација“, рече шпанскиот премиер Педро Санчез.
Минатата година Марк Руте присуствуваше на собирот во Давос како холандски премиер додека се обидуваше да ја добие сегашната работа како генерален секретар на НАТО, фалејќи го Трамп што ги притиска Европејците да ги зголемат трошоците за одбрана. Тој став - тогаш донекаде контроверзен - сега е широко прифатен.
Лидерот на една од најновите членки на Алијансата, шведскиот премиер Улф Кристерсон, внимателно ги избра своите зборови.
„Политиката се води на различен начин во САД во споредба со европските земји“, изјави тој за телевизијата „Блумберг“ во средата.
Дури и лидерите што се нашле на нишан на Илон Маск, чија масивна финансиска и поддршка преку социјалните мрежи за Трамп му помогна да добие место во најтесниот круг на претседателот, се трудеа да бидат љубезни.
Шолц одговори на прашање за сè поочигледната поддршка на Маск за екстремната десница во Германија без да го спомене најбогатиот човек на светот по име: „Во Европа имаме слобода на говор - а во Германија секој може да каже што сака, дури и ако е милијардер“, изјави германскиот лидер.
Британската министерка за финансии Рејчел Ривс само се насмеа на „тролањето“ на Маск, иако централнолевичарските влади како нејзината се најдоа во неповолна позиција со Трамп, обидувајќи се да одлучат дали да го игнорираат или да соработуваат со Маск.
Присутните неделава се прашуваа дали Трамп, кој во 2018 година слета во Давос со хеликоптер, можеби ќе ги изненади со негово лично присуство. Полскиот претседател во заминување Анджеј Дуда се возбуди од таа можност.
„Трамп секогаш размислува надвор од рамката“, изјави тој во интервју за телевизијата „Блумберг“.
Кина - освен што делеше портокалови играчки во форма на змии за да ја прослави Нова година - остана релативно незабележлива, за разлика од впечатливото присуство на заливските земји по шеталиштето.
Володомир Зеленски
Hollie Adams/Bloomberg
„Не сакаме да се мешаме во односите кога станува збор за овие прашања“, рече катарскиот министер за финансии Али Ахмед ал-Кувари, на прашањето за односите меѓу САД и Кина, јасно ставајќи до знаење дека нема заземање страни. „Ги разбирам мотивацијата и потезите на САД, но мислам дека тарифите се оружје со две сечила“.
Зеленски од Украина има потреба од сосема друг вид оружје за својата војна против руската инвазија. Кога станува збор за можноста за мировни сили ако некогаш се постигне примирје, тој беше директен за ограничувањата на Европа.
„Тоа не може без САД“, рече тој во интервју за „Блумберг“. „Дури и ако некои европски пријатели мислат дека може, не, не може. Никој нема да ризикува без САД“.
.webp){kind=icon}