Европската Унија (ЕУ) предлага нови правила за емисијата на последната генерација мотори со внатрешно согорување, покажуваат документите до кои дојде „Блумберг“. Се очекува дека Унијата ќе ги објави прописите што ги регулираат т.н. мотори „еуро 7“, кои се дел од последниот бран бензински и дизелски автомобили, а кои ќе излезат на пазарот пред да бидат официјално забранети според новите правила за емисија на штетни гасови од 2035 година.
Новата рамка е со заострени ограничувања за загадувачите, вклучувајќи го и јаглеродниот моноксид, од 2025 година. Усвојувањето на правилата досега се одложуваше неколкупати поради неусогласувањата за нивната содржина. Раководителите од автомобилската индустрија, вклучувајќи го и Карлос Таварес, главен извршен директор на „Стелантис“, тврдат дека најновите чекори за намалување на емисијата на ЦО2 од автомобилите претставуваат непотребно оптоварување за индустријата и дека само ќе го забават преминот на секторот кон електрификација.
Поддржувачите на новите правила тврдат дека некои возила што ќе бидат пуштени во продажба меѓу 2025 и 2035 година ќе се продаваат на пазарот како половни и ќе се возат уште десетици години по улиците, што значи дека построгите правила на крајот може да спасат илјадници животи.
„Транзицијата кон возен парк на автомобили и комбиња со нулта емисија ќе биде распределена низ две децении, и тоа не само поради просечниот век на траење на автомобилите и комбињата, за кои се смета дека е 11 години“, се наведува во нацртот. Во меѓувреме, за да се постигнат горенаведените цели на политиката, возилата со мотори со внатрешно согорување, кои и натаму ќе се пласираат на пазарот, мора да бидат што почисти.
Правилата, како дел од Европскиот зелен договор, чија цел е да ја постави економијата на континентот на одржливи темели, ќе развие свои строги стандарди за емисија за сите возила на бензин или дизел. Одлуката за „еуро 7“ следува откако ЕУ минатиот месец постигна значаен договор за фактичка забрана на нови автомобили со мотори со внатрешно согорување од 2035 година, принудувајќи ги компаниите да ги ревидираат своите производствени линии. Тој притисок претставува ризик за вработувањата и за достапноста на возила, рече минатата недела Тјери Брејтон, надлежен од ЕУ за внатрешен пазар, навестувајќи дека одложувањето на политиките е можно до 2026 година.
.webp){kind=icon}
Во моментов нема коментари за веста. Биди прв да коментира...