Претседателката на Европската централна банка (ЕЦБ) Кристин Лагард изјави дека би била изненадена доколку ова е највисокото ниво на инфлација во еврозоната, што укажува на тоа дека кампањата за зголемување на каматните стапки не е ни приближно завршена.
„Би сакала да се покаже дека октомври го означува врвот на инфлацијата, но се плашам дека тоа не е така“, рече таа денеска во Европскиот парламент во Брисел. „Има преголема неизвесност, особено за едно конкретно прашање, а тоа е трансферот на високите цени на енергијата од големопродажба во малопродажба, за да можеме да претпоставиме дека инфлацијата го достигна својот врв. Јас би била изненадена од тоа“, додаде таа.
Иако вкупното темпо на раст на потрошувачките цени во ноември веројатно забави за прв пат во претходните 18 месеци, сепак остана над 10 проценти, предвидуваат речиси сите економисти. Средната вредност од 41 проценка во истражувањето на Блумберг покажува вредност од 10,4 отсто, а извештајот ќе биде објавен во среда.
Инвеститорите бараат знаци дека намерата на ЕЦБ за големи зголемувања на каматните стапки ќе се намалува по најагресивните зголемувања на трошоците за задолжување од основањето на централната банка. 19-члената заедница исто така се соочува со рецесија. Некои членови на 25-члениот Извршен одбор веќе повикаа на помали зголемувања на каматните стапки, особено во светло на се појасните планови за продажба на обврзници во вредност од околу пет трилиони евра што централната банка ги купи за време на претходната криза.
Од друга страна, некои членки не гледаат простор за отстапки бидејќи инфлацијата е на ниво пет пати повисоко од целта од два отсто. Холандскиот централен банкар Клас Нот претходно изјави дека Европа треба да се подготви за „долг период“ во кој ЕЦБ ќе треба ја врати инфлацијата во рамките на целта. „Колку далеку треба да одиме, и колку брзо ќе стигнеме таму, ќе зависи од ревидираните проекции, од истрајноста на самите шокови, од реакцијата на платите и инфлациските очекувања, како и од нашата оценка за успешноста на трансмисијата на нашата монетарна политика. “, рече Лагард.
Ова може да значи зголемување на трошоците за задолжување на нивоа што ќе го ограничат економскиот раст, додаде таа, бидејќи ценовните притисоци остануваат. „Секогаш кога ќе ги прашам моите врвни економисти во ЕЦБ за ризиците, секогаш добивам одговор дека тие се асиметрични нагоре“, заклучува таа.
.webp){kind=icon}
