Германската економија веројатно стагнираше во последното тримесечје од 2022 година, намалувајќи ги стравувањата дека војната во Украина и зголемената инфлација предизвикаа рецесија. На годишно ниво производството се зголеми за 1,9 отсто, објави денеска националното статистичко биро. Тоа, секако, претставува намалување од растот од 2,6 проценти постигнат во 2021 година. Остварената стапка на раст е нешто над процената од 1,8 отсто во истражувањето на „Блумберг“, додека економистите предвидуваа пад од 0,5 отсто за четвртиот квартал.
Раст на германскиот БДП по тримесечја / Bloomberg Mercury
До таквото забавување дојде бидејќи руската инвазија го скрати закрепнувањето по пандемијата, изнудувајќи болни промени во бизнисот и политиките. На почетокот од 2022 година постоеја големи надежи дека постепеното укинување на двегодишните ограничувања поради ковид ќе ја зголеми побарувачката и се предвидуваше дека бруто-домашниот производ (БДП) ќе скокне за четири отсто.
Но по руската инвазија врз Украина во февруари, најголемата европска економија се соочи со суровата реалност дека треба сериозно преиспитување на нејзиниот бизнис-модел, поткрепен со евтини испораки на природен гас од Кремљ.
Владата на канцеларот Олаф Шолц успеа накратко да најде алтернативни извори на енергија, а помогна и невообичаено топлото зимско време. Во меѓувреме, бизнисите ги рекалибрираа синџирите на снабдување откако производството во некои фабрики беше принудено да запре во раните денови од војната.
Сепак, останува уште многу работа, а дополнителна компликација претставуваат зголемените трошоци на бизнисите и потрошувачите во годините што доаѓаат. Инфлацијата го достигна врвот од 11,6 отсто минатата година и ќе остане покачена до 2025 година, и покрај дарежливите владини мерки за олеснување.
Економистите почнаа да прогнозираат пад на германската економија уште во септември, откако показателите за доверба паднаа и анкетите на менаџерите за набавки сигнализираа дека производството почнува да опаѓа.
Но неодамна завладеа скромен оптимизам. Фабриките го одржуваат производството и покрај послабата побарувачка, работејќи на долгата листа нарачки што беа задржани поради логистичките тесни грла.
Компаниите, вклучувајќи го и „Фолксваген“ (Volkswagen AG), велат дека тие проблеми сега се намалуваат. Производителот на автомобили очекува зголемување на продажбата оваа година, посочувајќи на нарачки од 1,8 милион возила во Западна Европа.
И цените на гасот го достигнаа својот врв откако благите температури ја намалија потрошувачката. Сега се очекува дека земјата ќе ја преживее зимата без никакви недостатоци, дури и ако дојде до екстремен студ.
Напуштањето на Кина на политиката за нулта ковид порано од очекуваното исто така ќе даде дополнителен поттик за германските бизниси.
Аналитичарите анкетирани од „Блумберг“ сè уште гледаат дека производството ќе се намали за 0,6 отсто во 2023 година. Институтот Кил за светска економија, еден од водечките аналитички центри во земјата, е пооптимистичен и во декември ја ревидира својата прогноза за раст за оваа година од 0,3 отсто.
.webp){kind=icon}
Во моментов нема коментари за веста. Биди прв да коментира...