Европската Унија (ЕУ) настојува да го забрза производството од чисти технологии, нудејќи даночни олеснувања и домашни субвенции за компаниите во обид да го достигне историскиот зелен пакет на американскиот претседател Џо Бајден.
Европската комисија, како извршен орган на ЕУ, ќе предложи план што ќе му овозможи на блокот да избегне стратегиска зависност од клучните чисти технологии преку диверзификација на доставувачите и развивање на локалното производство, според нацртот на индустрискиот план за зелената зделка на комисијата, во кој „Блумберг њуз“ имаше увид. Иницијативата, која сè уште е подложна на промена пред нејзиното усвојување в среда, ќе ги олесни правилата за државна помош за да биде конкурентна на американскиот закон за намалување на инфлацијата, кој вклучува околу 500 милијарди долари нови трошоци и даночни олеснувања во текот на една деценија. Некои земји-членки изразија загриженост дека планот на ЕУ би можел неправедно да им користи на побогатите земји што имаат поголем фискален капацитет.
„Мора да бидеме претпазливи во ублажувањето на правилата за државна помош. Ние треба да им помогнеме на компаниите, но не можеме да ризикуваме да го ослабиме единствениот пазар. Треба да гарантираме еднакви услови за играње“, изјави денеска италијанската премиерка Џорџа Мелони.
Лидерите се среќаваат
Лидерите од 27-те земји-членки на ЕУ ќе разговараат за предлогот на комисијата во Брисел следниот месец. Планот за фондот за финансирање на иновативни сектори, кој првпат беше предложен во септември минатата година, ќе биде објавен до летоска, како дел од ревизијата на долгорочниот буџет на ЕУ. Некои од клучните ставки во предлогот на Комисијата вклучуваат:
*Акт за индустрија со нулта емисија (Net-Zero Industry) за поедноставување на регулативите, забрзување на издавањето дозволи и промовирање прекугранични проекти за забрзување на климатската неутралност.
*Понатамошно олабавување на правилата за државна помош за определен период. Тоа ќе опфати примена на сите обновливи технологии и декарбонизација на индустриските процеси. Исто така, ќе ја зајакне инвестициската поддршка за производство преку стратегиски чисти технологии со поголема поддршка што ќе одговара на тоа што го нудат САД и Кина.
*Поддршка за нови инвестиции во фабрики во клучните зелени сектори, вклучувајќи и преку даночни поволности и олеснувања во согласност со тоа што го нудат другите земји. Оваа помош ќе биде временски ограничена и ќе биде насочена кон тие области каде што има ризици од трансфер на работни места и инвестиции на друго место. Комисијата од државите членки ќе бара поголема транспарентност за фискалните стимулации што се нудат на национално ниво.
*Зголемување на прагот за поддршка од Комисијата во секторите како што се водород или чисти возила и поедноставување на постапката за важни проекти од заеднички европски интерес. Овие иницијативи се преземени од неколку земји-членки во најсовремените области.
*Во нацртот, Комисијата не предлага ново финансирање на краток рок. Најмалку 380 милијарди евра од постојните фондови на ЕУ ќе бидат инвестирани во зелената транзиција до 2030 година, а Комисијата ќе им помогне на членовите да ги приспособат своите средства за закрепнување од пандемијата за зелени иницијативи, вклучувајќи ја и можноста за користење даночни олеснувања.
*Прва аукција за производство на обновлив водород. Победникот ќе добие фиксна премија за секој килограм гориво што ќе го произведе во период од 10 години. Првата аукција ќе има буџет од 800 милиони евра. Влијанието ќе биде слично со даночните олеснувања за производство во американскиот пакет за чиста технологија. Комисијата ќе има цел да го олесни купувањето топлински пумпа за потрошувачите со тоа што до крајот на годината ќе предложи унифицирана енергетска ознака.
*Блокот ќе работи на формирање клуб за клучните суровини што ќе ги обедини потрошувачите и земјите богати со ресурси за да развијат заеднички принципи и начела. ЕУ, исто така, ќе развие стратегија за кредитирање на извозот, а Комисијата е подготвена да ги употреби своите инструменти за трговска заштита и други алатки за борба против нефер практики. „Фајненшл тајмс“ во понеделникот објави за нацрт-предлогот.
ЕУ ги повика САД да го изменат својот закон за да им дадат на европските компании поголема флексибилност да ги искористат предностите од понудените кредити. Но официјалните лица станаа скептични дека Вашингтон ќе направи значајни промени и почнаа да мапираат начини за заштита на европската индустрија.
Високата претставничка на ЕУ за конкуренција на пазарот, Маргрет Вестагер, предупреди дека преголемата национална поддршка за компаниите може да им наштети на помалите и посиромашните земји што имаат помал фискален капацитет. Германија и Франција, двете најголеми економии во ЕУ, имаат најголема корист откако Комисијата ги олесни постојните правила за да им помогне на фирмите да се справат со високите трошоци за енергија.
„Не ни е потребно прекумерно продолжување на субвенциите на ЕУ. Правилата за субвенционирање мора да бидат поагилни, мора побрзо да донесуваме одлуки, но не ни треба прекумерно продолжување на субвенциите во Европската Унија“, изјави денеска германскиот министер за финансии Кристијан Линднер.
.webp){kind=icon}
