Банката на Англија - БоЕ (Bank of England - BoE) планира да ги намали трошоците за работата во делот на климатските промени и да ги пренасочи парите кон основните функции поради зголемените притисоци врз нејзините трошоци. Климатските програми ќе се спуштат подолу на агендата на централната банка, за да можат официјалните лица повеќе да се фокусираат на основните операции, како што се финансиската стабилност, пазарите и дигиталните валути, информира лице запознаено со ситуацијата, кое побара да остане анонимно.
Климатската работа на БоЕ моментално се фокусира на градење насоки за објавување на ЕСГ, подготовка на осигурителни компании за ризиците од порастот на глобалните температури и наведување на банките да ги тестираат своите биланси базирани на јаглерод.
Овој потег претставува остар прекин од акцентот што Марк Корни го стави на климата за време на својот мандат како гувернер на БоЕ од 2013 до 2020 година.
Тоа ги одразува повиците на политичарите за актуелниот гувернер Ендрју Бејли да се фокусира на контрола на инфлацијата и идентификувањето на потенцијалните закани за финансиските пазари. Корни ги стави ризиците поврзани со климата за економијата во срцето на својот мандат во БоЕ, наредувајќи стрес-тестови на комерцијалните заемодавци за да се осигури дека го земаат предвид долгорочното влијание на зголемувањето на глобалните температури. Тој подоцна стана специјален пратеник на Обединетите нации за климата. Таа работа беше поддржана од конзервативната влада.
Риши Сунак, за време на својот мандат како канцелар на државната благајна во 2021 година, ја ажурира задачата на БоЕ за монетарната политика, за да ја одрази економската стратегија на владата за раст што е еколошки одржлив и конзистентен со транзицијата кон нето нулта економија.
Претставниците на БоЕ, предводени од Корни, се меѓу најгласните во зборувањето за ризиците поврзани со климата со кои ќе се соочува глобалната економија во наредните децении. Тие помогнаа да се изгради Мрежата за позеленување на финансискиот систем, група од речиси сите водечки централни банки во светот што ги координираат најдобрите практики за надзор. Таа работа беше поддржана од „Блумберг филантропис“ (Bloomberg Philanthropies), која исто така ја поддржа работата на Корни на Работната група за финансиски извештаи поврзани со климата.
„Блумберг филантропис“ е филантропска организација на Мајкл Блумберг, основач и мнозински сопственик на „Блумберг“ (Bloomberg LP), во чија сопственост, пак, е „Блумберг њуз“ (Bloomberg News).
Додека Бејли продолжи со тој напор, тој не беше толку видлив како својот претходник. Прашањето се тргна од центарот на вниманието во времето на пандемијата, а сега официјалните лица се борат да ја задржат инфлацијата под контрола и да се справат со економските превирања предизвикани прво од рестрикциите поради ковид, а потоа и од фискалната програма претставена за време на краткиот мандат на Лиз Трас минатата година.
Инфлацијата се искачи за повеќе од пет пати над целта на БоЕ од два отсто, што поттикна обвинувања од законодавците дека Бејли реагира премногу бавно во врска со ова прашање.
Bloomberg Mercury
И покрај фокусот на БоЕ на климата, банката често е изложена на напади од активисти што сакаат да извршат поголем притисок за декарбонизација на економијата преку финансискиот систем. Тие бараат зелено квантитативно олеснување за финансирање на транзицијата од фосилните горива кон нето нула емисии на стакленички гасови.
Предизвикот на климатските промени ќе остане еден од седумте стратегиски приоритети на БоЕ до следната година, но финансирањето сега веќе е намалено, кога нејзиниот јаглероден стрес-тест за банкарскиот систем заврши.
Од БоЕ одбија да коментираат.
Одлуката го одразува буџетското ограничување на БоЕ. Записниците од декемврискиот состанок на Управниот одбор на банката покажаа дека ќе мора да работи под строги буџетски ограничувања, што ќе наметне предизвици во целата организација. Во тој документ не беше прецизирано каде ќе се пренасочат заштедите. Неизвршните членови на управниот одбор на БоЕ рекоа дека се чини јасно дека ќе треба да се земат предвид ефикасноста и зголемувањето на продуктивноста со оглед на притисоците врз финансиите.
„Гувернерите рекоа дека се обиделе да ги деприоритизираат некои работни текови во последниве години, но мораше да се исполнат и законските обврски на банката“, пишува во објавените записници.
Покрај буџетските оптоварувања од инфлаторните притисоци, БоЕ неодамна потпиша договор за зголемување на платите за своите 5.000 вработени за 3,5 проценти плус еднократен додаток на платата од еден отсто.
.webp){kind=icon}
Во моментов нема коментари за веста. Биди прв да коментира...