.webp){kind=icon}
Европската централна банка (ЕЦБ) ќе заземе остар пристап, кој по потреба ќе ѝ овозможи на банката да одговори на инфлаторните ризици, но и ќе им помага на финансиските пазари ако се појават закани, рече претседателката Кристин Лагард.
„Не може да се преговара за враќање на инфлацијата на два отсто на среден рок. Тоа ќе го сториме на тој начин што ќе воспоставиме остра стратегија, која зависи од податоците и која подразбира подготвеност да се дејствува, но нема компромис околу примарната цел“, рече таа на денешната конференција на ЕЦБ, која се одржува во Франкфурт.
Претседателката на ЕЦБ вети поддршка за финансискиот систем доколку биде потребно и додаде дека ги разгледуваат ризиците во врска со потрошувачките цени, за кои таа тврди дека уште не исчезнале поради неодамнешните превирања на глобалниот пазар.
„Не гледаме јасни докази дека базичната инфлација опаѓа“, рече таа. Иако падот на цената на енергијата го ослабува клучниот двигател на растот на цените, Лагард додаде дека зголемувањето на домашните притисоци за цените може да неутрализира дел од овој дезинфлаторен импулс.
Претседателката на ЕЦБ го потврди наративот што се користеше во одлуката од минатата недела, дека ако базичната инфлација се задржи, тогаш ЕЦБ ќе има многу повеќе за покривање со монетарната политика.
Кристин Лагард, претседателка на ЕЦБ / Bloomberg
Главниот економист Филип Лејн, говорејќи на истиот настан, рече дека базичната инфлација би требало да се намали со текот на времето, иако го повтори ставот на Лагард во врска со каматните стапки.
„Би се согласил со фразата што ја употреби претседателката, дека ако основната инфлација се задржи, апсолутно ќе имаме многу повеќе работа. Сепак, ќе имаме и доста време да ги разгледаме опциите до следната одлука во мај“, рече Лејн.
Банкарите од ЕЦБ минатиот четврток ги покачија каматните стапки за 50 базични поени, продолжувајќи го на тој начин најдолгиот циклус на зголемување на каматните стапки во својата историја. Инфлацијата и натаму е превисока за да се опуштиме, тврдат банкарите, кои ветија дека ќе сторат сè што е потребно за да не пропадне системот.
„Јасно порачав дека нема компромис меѓу стабилноста на цените и финансиската стабилност. Имаме многу алатки да обезбедиме поддршка на ликвидноста на финансискиот систем ако има потреба од тоа и да обезбедиме непречено функционирање на монетарната политика“, рече денеска Лагард.
Јоаким Хагел, претседател на Бундесбанк на Германија / Bloomberg
Претседателот на Бундесбанк, централната банка на Германија, Јоаким Нагел, во претходно објавен коментар на „Фајненшл тајмс“ рече дека ЕЦБ не заврши со покачување на каматните стапки.
„Има уште време, но се приближуваме кон рестриктивна територија. Ако сакаме да ја скротиме оваа тврдоглава инфлација, ќе мора и ние да сме потврдоглави“, рече Нагел.
Во својот говор Лагард изјави дека банкарите внимателно ќе го следат банкарскиот сектор во следните недели и месеци за да видат дали компаниите имаат помал интерес за земање кредити. Некои економисти сугерираат дека тоа е резултат на сè поголемите трошоци за финансирање во светот каде што постојат превирања во тој сектор.
„Иако порестриктивните кредитни услови се дел од механизмот со кој нашето заострување на крајот ќе го заузди прекумерниот притисок врз цените и ќе ја врати инфлацијата на целното ниво, ќе се погрижиме целиот процес да биде уреден“, рече Лагард.
