Германската инфлација значително се намали, главно благодарение на падот на трошоците за природен гас, откако тие претходно нагло пораснаа по нападот на Русија врз Украина пред нешто повеќе од една година.
Потрошувачките цени во најголемата европска економија во март се зголемија за 7,8 отсто на годишно ниво, што е значително помалку од 9,3 проценти, колку што изнесуваше инфлацијата во февруари, објави денеска германскиот завод за статистика. Тоа е нешто повеќе од просечната процена од 7,5 отсто во анкетата на „Блумберг“ спроведена меѓу економистите, но сепак нуди одредено олеснување за Европската централна банка (ЕЦБ), чии претставници ги зголемија каматните стапки за 350 базични поени од јули минатата година, со цел да се справат со најлошиот скок на цените од ерата на еврото.
Потрошувачки цени во Германија / Bloomberg Mercury
Сепак, многу од креаторите на политиките се загрижени дека основната инфлација, која всушност ги отстранува нестабилните ставки како храната и енергијата, останува покачена.
И покрај тоа што главниот мерач на Шпанија речиси се преполови овој месец, паѓајќи на 3,1 отсто, нејзината основна мерка се намали само на 7,5 проценти. Иако Германија не ги нуди податоците за базичната инфлација во овој свој првичен извештај, сепак, според „Блумберг економикс“ (Bloomberg Economics), регионалните податоци сугерираат дека таа во март се забрзала на 5,7 проценти од февруарските 5,4 отсто.
Што вели „Блумберг економикс“?
„Во наредните месеци вкупната инфлација треба да остане далеку под стапките забележани есеноска и зимоска. Сепак, за ЕЦБ ова не е причина за славење, бидејќи основните ценовни притисоци во најголемата европска економија сè уште се загрижувачки силни. Базичната инфлација веројатно достигна ново историски највисоко ниво во март и може дополнително да се искачи до летово“, смета економистот Мартин Адемер.
Како националните бројки ќе се одразат на ниво на 20-члената еврозона ќе се знае в петок, при што аналитичарите очекуваат главната мерка за инфлација да се забави до 7,1 отсто, дури и во услови кога мерачот на базичната инфлација ќе достигне рекордни 5,7 проценти.
Платите се клучен фактор што официјалните лица го следат во анализите за тоа дали растот на цените станува вкоренет. Преговорите со работниците во германскиот јавен сектор, кои сакаат двоцифрено зголемување на платите, завршија без договор и ќе одат на независна арбитража.
Владата на канцеларот Олаф Шолц спроведе широки мерки за да го ублажи ударот од повисоките цени на гасот и струјата. Но, иако германската економија се покажа поотпорна од очекуваното по брзото одвраќање од руските испораки на гориво, се предвидува дека Германија ќе доживее блага рецесија во шесте месеци заклучно со март.
За ЕЦБ борбата со инфлацијата беше дополнително комплицирана, бидејќи тензиите што ги зафатија банките низ светот се закануваат да го спречат кредитирањето и да го запрат економскиот раст. Членот на Управниот совет, Питер Казимир, вчера рече дека иако ЕЦБ треба да продолжи да ги зголемува стапките, можеби тоа би требало да го прави побавно, наведувајќи го како причина реалниот ризик банките да го ограничат кредитирањето по неодамнешните превирања во финансиската индустрија.
.webp){kind=icon}
Во моментов нема коментари за веста. Биди прв да коментира...