.webp){kind=icon}
Германската инфлација изненадувачки забрза во февруари, дополнително комплицирајќи ја задачата на Европската централна банка (ЕЦБ).
Потрошувачките цени во најголемата европска економија пораснаа за 9,3 проценти од пред една година, главно поттикнати од трошоците за услуги и храна. Таквите податоци дојдоа дури и покрај тоа што Германија ги ограничи сметките за греење на домаќинствата, кои се зголемија поради инвазијата на Русија врз Украина.
Потрошувачки цени во Германија / Bloomberg Mercury
Аналитичарите во истражувањето на „Блумберг“ очекуваа забавување на инфлацијата до девет проценти. Податоците за најголемата европска економија вршат поголем притисок врз ЕЦБ откако француската инфлација го достигна рекордот од ерата на воведување на еврото, а шпанскиот раст на цените им пркоси на процените дека ќе биде умерен.
Тоа ги поттикна пазарите за првпат да проценат максимум од четири отсто на депозитната стапка на ЕЦБ, која моментално изнесува 2,5 проценти. Официјалните лица се подготвуваат да ги зголемат трошоците за задолжување за уште половина поен во март, при што многумина поддржуваат големи потези надвор од тоа сè додека инфлацијата не се врати кон целта од два отсто.
Бројките од 20-члената еврозона се очекува да бидат објавени в четврток. Економистите предвидуваат забавување на 8,3 проценти од 8,6 отсто, колку што изнесуваше растот на цените во јануари на годишно ниво, иако основниот мерач што ги исклучува нестабилните трошоци за енергија и храна, кој е главен фокус за креаторите на политиките на ЕЦБ во последно време, се смета дека останува на рекордни 5,3 проценти.
Што велат економистите на „Блумберг“?
„Низата на негативни изненадувања за податоците за инфлацијата во најголемите економии во еврозоната за ЕЦБ е непријатна. Ладна утеха е тоа што најголемиот дел од промашувањата се однесува на храната и енергијата“, вели економистот Мартин Адемер.
Обраќајќи им се на новинарите во Франкфурт денеска, претседателот на Бундесбанк, Јоаким Нагел, предупреди дека притисоците на основните цени остануваат многу зголемени и дека стапката на инфлација веројатно ќе се повлекува постепено годинава во Германија, во просек меѓу шест и седум отсто.
„Едно е јасно: најавеното зголемување на каматната стапка во март нема да биде последно. Слични чекори за каматните стапки можеби ќе бидат потребни и потоа“, рече тој во говорот.
Додека Нагел одби да шпекулира за крајот на циклусот за затегнување на монетарната политика, неговиот француски колега Франсоа Вилерој де Галхау во Париз рече дека е пожелно ЕЦБ да го достигне врвот до септември. Шефот на Банката на Италија, Игнацио Виско, рече дека нема сомневање дека затегнувањето на монетарната позиција во еврозоната мора да продолжи за да се осигури дека инфлацијата нема да стане поупорна.
