Европската централна банка (ЕЦБ) ги зајакнува контролите на резервите за ликвидност на заемодавците и би можела да објави построги барања за поединечни фирми во текот на оваа година, велат лица запознаени со ова прашање.
Годишнaта ревизија на ЕЦБ за ризиците со кои се соочуваат банките веројатно ќе му посвети поголемо внимание на управувањето со ликвидноста, вклучувајќи го и потенцијалот за повисока граница на клучните метрики, како што е стапката на покриеност на ликвидноста, посочуваат изворите, кои на оваа тема зборуваа под услов да останат анонимни, бидејќи станува збор за доверливи информации. Веста доаѓа во моменти кога гледаме зголемени интеракции меѓу банките и ЕЦБ на оваа тема, нагласуваат лицата.
Мартовскиот колапс на „Кредит Суис“ (Credit Suisse Group AG) и на американските банки, вклучувајќи ја и „Силикон валеј“ (СВБ), отвори прашања колку банките се навистина подготвени да го издржат притисокот врз депозитите и ефективноста на метриката што ја користат инвеститорите и регулаторите за да ја измерат нивната способност да издржат криза.
Иако ликвидноста е клучен дел од супервизијата на банките, надзорните органи неодамна, во ерата на ниски каматни стапки, беа фокусирани на поитни прашања поврзани со банкарскиот капитал и кредитниот ризик. ЕЦБ почна да ги притиска банките да посветат внимание на ликвидноста кон крајот на 2021 година, бидејќи повисоката инфлација укажа на зголемување на трошоците за финансирање. Неодамнешниот колапс на американските заемодавци ја зголеми контролата.
Портпаролот на ЕЦБ одби да коментира на оваа тема.
Bloomberg Mercury
ЕЦБ најверојатно во текот на летото ќе ги добие првичните резултати од својот годишен преглед на ризиците со кои се соочуваат банките, велат познавачите на ова прашање. Во текот на годинава официјалните лица ќе ги поделат банките во различни групи во зависност од тоа колку нивните деловни модели се ранливи на одливи, посочуваат двајца од изворите.
Депозитите од богатите клиенти веројатно ќе бидат во фокусот, бидејќи поединечните повлекувања можат брзо да ги исцрпат резервите за ликвидност на банката, велат изворите. Тоа беше еден од елементите на кризата кај „Кредит Суис“. Финансирањето на пазарот и перцепциите на клиентите за безбедноста на нивните заштеди исто така веројатно ќе бидат релевантни, нагласуваат упатените.
Швајцарските регулатори прогласија дека ликвидноста на „Кредит Суис“ е во ред само неколку дена пред итно да биде спасувана од ривалот УБС (UBS Group AG) за време на викенд. Дотогаш беше на работ на колапс, дури и со помош на централната банка.
Европските банкари и регулатори веќе некое време сакаат да посочат дека „Кредит Суис“ е посебен случај и дека не постои директен страв од прелевање на неодамнешните превирања во САД кон Европа. Еврозоната нема доживеано масовно повлекување средства од банките, особено затоа што сите банки во блокот се предмет на регулација на ликвидноста. Тие исто така покажуваат помала просечна изложеност на ризик од каматната стапка во нивните банкарски списи во однос на американските фирми, според ЕЦБ.
Од европските банки се бара да чуваат повеќе висококвалитетни ликвидни средства од очекуваните одливи за време на 30 дена на стрес. ЕЦБ има моќ да го зголеми тоа барање, познато како коефициент за покривање на ликвидноста, иако официјалните лица јавно признаваат дека ретко го прават тоа.
Пондерираниот просек за европските банки беше 165 отсто во четвртиот квартал, што е значително над минимумот од 100 отсто, покажуваат податоците на Европската банкарска управа (ЕБА). Индивидуалните заемодавци објавуваат сопствени бројки, но генерално не откриваат никакви дополнителни барања над минимумот.
Bloomberg
Како алтернатива за подигање на коефициентот за покривање ликвидни средства (LCR показател), ЕЦБ би можела да ги критикува поединечните банки за квалитетот на нивните резерви или нивната способност да управуваат со нив, велат познавачите. На заемодавците со пониски резерви од нивните конкуренти може да им се каже дека заостануваат, зголемувајќи го притисокот за подобрување на резервите, или потенцијално ќе се соочат со пониска оценка за нивната способност да управуваат со ризикот, нагласуваат изворите.
„Неодамнешните случувања, особено брзината на информациите и одлуките донесени од штедачите и другите учесници на пазарот, потврдуваат дека ’треба да им се посвети поголемо внимание’ на ликвидноста и финансирањето на банките“, вели Андреа Енрија, највисокиот супервизорски функционер на ЕЦБ.
Со затегнување на монетарната политика, „ја идентификувавме потребата да се фокусираме на одржливоста на плановите за финансирање на банките“, им порача Енрија на европските министри за финансии во понеделникот. „Како резултат на тоа, во супервизорските приоритети поголемо значење им се дава на ликвидносните и финансиските ризици“.
.webp){kind=icon}
