Ако Велика Британија значително не ги зголеми вложувањата во обновливи извори на енергија во време кога инвестициите во нафта и гас паѓаат, потенцијално ќе бидат загрозени дури 95.000 офшор работни места во секторот енергетика, покажува истражувањето на Универзитетот „Роберт Гордон“ во Абердин.
Работните места во енергетиката имаат огромен потенцијал да растат доколку Британија ги исполни своите цели за чиста енергија, но бавниот напредок би можел да значи дека офшор позициите може да се намалат за 15 отсто до крајот на деценијата, рече Пол де Лив, директор на универзитетскиот институт за енергетска транзиција.
Климатските цели на Велика Британија за 2030 година вклучуваат изградба на капацитети од 50 гигавати од ветер на море. Сепак, овој план можеби нема да се реализира бидејќи аукциите за нови проекти одржани неодамна не привлекоа никакви понуди. Британија е втор по големина пазар по јачината на ветер на море, но инфлаторните притисоци и зголемените трошоци ги попречуваат понатамошните инвестиции во ветерни електрани.
Владата, исто така, има за цел да има 10 гигавати водород и дури 30 милиони тони годишно капацитет за „заробување“ на јаглерод до 2030 година. Голем дел од работните места за чиста енергија ќе бидат наменети за работниците кои моментално работат во индустријата за фосилни горива, и доколку се постигнат целите, работната сила на море би можела да се зголеми за околу 50 отсто, покажува извештајот.
„Големата награда во форма на значителен број на работни места е сè уште на дофат“, објави институтот. „Но, ако не се постигнат целите и амбициите за енергетската транзиција, тоа ќе значи изгубена шанса“.
.webp){kind=icon}
