.webp){kind=icon}
Европската централна банка (ЕЦБ) предупреди 20 банки дека ќе бидат казнети доколку не ги решат прашањата за управување со климатските ризици, соопштија информирани извори, пишува „Блумберг“.
Во дописите кои овој и минатиот месец ги испратила, ЕЦБ им дава на банките поединечни рокови да ги решат овие прашања. Дел од банките тоа морат да го сторат до март, информираат изворите. Тоа што најеројатно ќе бидат предвидени и парични казни се коментира како заострување на ставот на ЕЦБ која полека го губи трпението по ова прашање, велат изворите.
Портпаролот на ЕЦБ одбил да коментира.
ЕЦБ постојано ги предупредува заемодавачите во еврозоната дека не се подготвуваат доволно за ефектите од екстремните временски услови врз вредноста на средствата или ризикот клиентите со висока јаглеродна енергија да згаснат. Во интервју за „Блумберг“ во септември, функционер од централната банка ги наведе казните како опција за фино прилагодување на надзорот и оддалечување од капиталните додатоци како примарна алатка.
Европската банкарска управа објави дека ја ревидира рамката поставена за капиталните барања во индустријата за подобро да ги инкорпорира стандардите за ЕСГ (ESG).
ЕЦБ, која освен што ги одредува каматните стапки ги надгледува и банкарските институции во еврозоната, располага со различни алатки. Тие ги вклучуваат овластувањата што ѝ дозволуваат да бара од банките да плаќаат дури пет отсто од нивната просечна дневна заработка до шест месеци, доколку направат прекршоци.
Правила и во Македонија
Во октомври годинава беа донесени и првите насоки за управување со ризиците поврзани со климатските промени, коишто деловните банки ќе ги земат предвид при формулирање и спроведувањето на својата деловна стратегија и во процесот на управување со ризиците. Сепак во тој документ евентуални казни не се споменати.
Со овој документ за прв пат се дефинираат насоки за банките за соодветно вградување на влијанието на ризиците поврзани со климатските промени во нивните деловни стратегии и долгорочните стратегиски цели, во процесот на управување со ризици, вклучително и проценка на влијанието на климатските ризици врз другите ризици на кои се изложени банките, во правилата за стрес-тестирање и информативниот систем, како и насоки во однос на организациската поставеност на управувањето со ризиците и градењето соодветни капацитети за разбирање на влијанието на овие ризици врз начинот на работа на нивните клиенти.
„Дополнително, овие насоки можат да послужат и како добра основа за градење на супервизорскиот дијалог помеѓу банките и Народната банка во однос на можните практики за идентификување, мерење, следење и контрола или ублажување на ефектите од ризиците поврзани со климатските промени.“, велат од НБМ.
