Макроекономскиот хеџ фонд EDL Capital (ЕДЛ Капитал) се обложува дека еврото ќе падне на нивоа што не се забележани од првите денови на неговото основање пред повеќе од 20 години, бидејќи неконтролираната инфлација поттикнува политичка нестабилност и нестабилност на пазарот на обврзници што може да ја тестира кохезијата на регионот.
„Тоа може да предизвика почеток на 'мечкин пазар' за еврото, за разлика од сегашниот налет на јачината на доларот што ја ослабна заедничката валута“, смета основачот на EDL, Едуар де Ланглејд. Тој тврди дека ризиците од испораките на гас од Русија ќе поттикнат рекордна инфлација, принудувајќи агресивно зголемување на каматните стапки во време на рецесија и предизвикувајќи Германија потенцијално да се откаже од трошоците за одржување на еврозоната.
„Европа е на работ на катастрофа, што потенцијално може да доведе до нејзин колапс“, им порачува Де Ланглејд на клиентите во писмо од овој месец, во кое Bloomberg имал увид. „Може да дојдеме до тоа дека доларот не е силен во однос на сè, туку еврото станува слабо во однос на сè“, додава тој, навестувајќи дека еврото може да падне на 80 американски центи.
Менаџерот со пари, кој управува со 751 милион долари во неговиот макроекономски хеџ фонд, е познат по своите големи и смели облози. Де Ланглејд, кој претходно тргуваше за „Мур Капитал Менаџмент“ (Moore Capital Management), главно заработуваше за своите клиенти од лансирањето на фондот во 2015 година, но претрпе рекордни загуби во февруари поради облози на Русија.
Комбинацијата на растечкиот долар, поттикнат од затегнувањето на монетарната политика од страна на Федералните резерви (ФЕД) и европските ризици веќе овој месец доведоа до пад на еврото на паритет, за прв пат по 20 години. Де Ланглејд забележува натамошен пад, блиску до нивото на кое Европската централна (ЕЦБ) банка интервенираше за зајакнување на еврото во 2000 година.
Bloomberg
ЕЦБ овој месец го започнува циклусот на зголемувања на каматните стапки што ја открива ранливоста на различните економии во еврозоната, една деценија откако поранешниот шеф на ЕЦБ, Марио Драги, вети дека ќе направи сè што е потребно за да го спаси еврото. Стравот е дека трговците ќе предизвикаат зголемување на трошоците за позајмување на позадолжените земји, како што е Италија, со обложување на нивните обврзници.
За да се справи со негативните последици, ЕЦБ воведе алатка која ќе овозможи да ги купува обврзниците на земјите кои се соочуваат со пораст на приносите на државните обврзници поради пазарните шпекулации, под одредени услови. Но, трошоците за тоа може да бидат огромни, тврди Де Ланглејд.
„Европа нема заеднички трезор и трошоците за одржување на целоста на Европа се високи“, посочува тој во писмото. „Многу е можно Германците, откако ќе се најдат во нивните финансиски тешкотии, да одбијат да направат сè што е потребно за да одржат тесен распон помеѓу приносите на обврзниците“, стои во пораката.
Де Ланглејд смета дека јачината на доларот може да се намали, со што ќе заврши неговата апрецијација во однос на другите валути.
„Обложувањето против еврото преку канадскиот или австралискиот долар тогаш може да биде одличен начин за игра“, пишува тој, додавајќи дека заедничката валута продолжува да се намалува благодарение на високите цени на енергијата.
Европските економии веќе страдаат од недостиг на руски гас, додека падот на коалициската влада на Драги во Италија предизвикува загриженост за дополнителни политички турбуленции. Де Ланглејд потсети и на присилната оставка на Борис Џонсон и за гласањето за екстремистите во Франција.
.webp){kind=icon}
