Обемот на индустриското производство во Германија годинава падна за првпат, што покажува дека овој сектор на најголемата европска економија сè уште е во неволја.
Производството во март падна за 0,4 отсто, а најголем пад е забележан кај производството на потрошувачка и делумно готови (интермедијарни) производи и енергија, покажуваат официјалните податоци. Овој резултат е сепак подобар од очекувањата на аналитичарите анкетирани од „Блумберг“, бидејќи очекуваа намалување на обемот на производството за 0,7 отсто.
Претседателката на Европската централна банка (ЕЦБ), Кристин Лагард, во април изјави дека неодамнешните скокови на производството во Германија се знак дека најлошото време за европската економија е зад нас.
Bloomberg
По две години во кои речиси стагнираше, германската економија забележа раст на почетокот на 2024 година. Сепак, економскиот раст е сè уште слаб, а најголемата слабост може да се забележи во преработувачката индустрија, сектор што е поважен за Германија отколку за другите земји од еврозоната.
Податоците од вторникот покажаа дека фабричките нарачки неочекувано паднале во март, а производителите и понатаму се оптоварени од намалената глобална побарувачка, високите каматни стапки и повисоките цени на енергијата, кои дојдоа како резултат на војната во Украина.
Производителот на челик „Салзгитер“ во вторникот изјави дека годинашниот профит би можел да биде помал отколку што се мислеше поради развојот на настаните во секторот.
Од позитивна страна, податоците за трговијата покажаа дека извозот скокнал за 0,9 отсто, а неочекувано се зголемил и увозот.
Бундесбанк во април соопшти дека „ситуацијата во германската економија е донекаде подобрена, но дека целосното закрепнување сè уште е под знак прашалник“. Германската влада исто така неодамна ја зголеми проекцијата за економски раст од 0,2 на 0,3 отсто.
.webp){kind=icon}
