Германското индустриско производство во минус два месеца по ред

Германското индустриско производство во јуни падна втор месец по ред, дополнително продлабочувајќи ги проблемите на најголемата економија во еврозоната, која едвај излезе од рецесијата на почетокот на годината. Според германскиот завод за статистика, производството паднало за 1,5 отсто во споредба со мај, а најголеми проблеми предизвикале автомобилската индустрија и градежништвото.

Просечната прогноза во истражувањето на „Блумберг“ меѓу економистите беше пад од 0,5 отсто. Индексот на производството падна на најниско ниво од декември. Германските фабрики се слаби поради слабата побарувачка од Кина, недостигот од работници, заострената монетарна политика и долготрајните ефекти од минатогодишната енергетска криза, наведува „Блумберг“.

Тоа се одразува на целата економија, која, според прогнозите на Меѓународниот монетарен фонд, годинава ќе биде единствената од групата седум најголеми економии што ќе доживее пад на бруто-домашниот производ (БДП). Германија стагнираше во вториот квартал по зимската рецесија. „Пресврт сè уште не е на повидок“, рече Ралф Вичерс, главен економист за ВДМА (VDMA), германска инженерска федерација, која во текот на претходната недела во извештајот покажа голем пад на производствените нарачки во јуни во однос на претходната година.

 

 

Падот на германското производство се одрази на пониското индустриско производство во Франција и Шпанија овој месец. Меѓу четирите најголеми економии во еврозоната, производството се зголемило само во Италија, а тоа главно се должи на производството на возила. За Европската централна банка (ЕЦБ) овие податоци ќе бидат уште еден доказ за влошувањето на економијата во еврозоната, што веќе беше забележано при последната одлука за каматните стапки минатиот месец. Креаторите на политиката не посочија дали имаат намера да воведат поголемо заострување или пауза на претстојниот состанок во септември. Има малку показатели дека индустриската рецесија во Германија е завршена. Фабричките нарачки се зголемија најмногу во последните три години во јуни, но тоа само му стави крај на закрепнувањето од уште поголемиот пад во март. Оваа среда, германскиот канцелар Олаф Шолц и неговиот кабинет ќе одобрат 20 милијарди евра за дополнување на фондот за заштита на климата од 200 милијарди евра и инвестиции во производството на полупроводници, велат изворите. Тие имаат намера и со ова да го стимулираат економскиот раст.

Во моментов нема коментари за веста. Биди прв да коментира...

Остави коментар