.webp){kind=icon}
Нарачките во германските фабрики се зголемија во мај, што дава позитивен сигнал дека производството може да ја ублажи рецесијата што ја тресе најголемата европска економија. Побарувачката бележи раст од 6,4 отсто во мај споредено со април. Споредено со претходната година, вкупните нарачки сè уште се намалени за 4,3 отсто.
Автомобилската индустрија е секторот со највисок раст на нарачките. Во категоријата друга транспортна опрема, која вклучува и опрема за бродови и воен материјал, нарачките скокнале за 137 отсто.
Извештајот е редок доказ за добри вести во време кога германскиот бизнис постојано покажува знаци дека во вториот квартал од годината се бори со негативно производство.
Очекувањата на производителите на автомобили, според извештајот објавен во средата, се полоши од финансиската криза во 2008 година. И менаџерите за набавка претходната недела укажаа на влошување на индустрискиот сектор во Германија.
Најголема причина за падот на фабричките нарачки е лошата побарувачка во Кина, која ја губи динамиката по неколкумесечното намалување на нејзиното производство иако е втора економија по големина во светот.
Меѓу германските компании што страдаат од намалена побарувачка на индустриските компании е компанијата за хемиски производи „Ланксес АГ“ (Lanxess AG). Очекувањата се дека нема да има подобрување во производствените бизниси во земјата за брзо време, бидејќи мерките од монетарната политика ќе влијаат на економскиот раст.
Додека Германија е моторот на европската економија, сликата со индустрискиот сектор во регионот е различна. Во Италија менаџерите за набавка се изјаснија дека производството го бележи најлошиот месец по екот на пандемијата во почетокот на 2020 година. За разлика од Италија, податоците за фабричкото производство во Франција се зголемија во мај на највисоко ниво во последните три години. Зголемување на производството бележи и Шпанија.
