Што ќе се случи со банкнотите и монетите со ликот на кралицата Елизабета?

Кралицата Елизабета Втора одамна е препознатливо лице на британските банкноти и кованици. Нејзиниот портрет, исто така, е прикажан и на валутите во десетина други држави ширум светот, како потсетник на колонијалниот домет на британското кралство.

Што ќе се случи со тие банкноти по смртта на кралицата? На Обединетото Кралство, Канада, Австралија, Нов Зеланд и другите земји ќе им треба време да ги заменат монарсите на своите валути, но тоа не значи дека старите банкноти нема да важат.

Што ќе се случи со валутите со ликот на покојната кралица?

Промена на монархот

Се очекува дека портретот на кралицата на британските банкноти и кованици ќе биде заменет со ликот на новиот крал Чарлс Трети, но тоа нема да се случи веднаш.

„Сегашните банкноти со ликот на Нејзиното Височество Кралицата и натаму ќе бидат законско средство за плаќање“, соопштија од англиската централна банка. Информацијата за тоа од страна на централната банка на Обединетото Кралство, која што е издавач на банкнотите, официјално ќе биде објавена откако ќе заврши десетдневната жалост.

Од Кралската ковачница, која што е официјален произведувач на британските кованици, рекоа дека сите кованици со нејзиниот портрет „и натаму се во оптек и се законско средство за плаќање“, а повеќе информации ќе бидат подоцна објавени. „Додека го почитуваме овој период на жалост ќе продолжиме да коваме монети како и вообичаено“, објави Кралската ковачница на својата интернет страница.

Со 4,7 милијарди британски банкноти во вкупна вредност од 82 милијарди фунти (95 милијарди долари) во оптек и околу 29 милијарди кованици, британските пари со ликот на кралицата веројатно ќе бидат во оптек со години.

„Наместо веднаш да се предадат сите банкноти и монети, процесот ќе се одвива етапно и многу пари со портретот на кралицата Елизабета Втора ќе останат во оптек уште многу години“, наведува Коин Експерт (Coin Expert). По преземањето на круната од новиот крал Чарлс Трети, ќе мора да се направи нов портрет за редизајнирање на банкнотите и монетите, се наведува на интернет страната на Кралската ковачница.

Кованиците ќе го прикажуваат свртен налево, за разлика од кралицата која гледа надесно, во согласност со традицијата, која датира од 17 век. Таа налага монарсите да се прикажуваат во спротивен правец од својот претходник.

Што е со другите држави?

Валутите на другите нации, кои ја прикажуваат кралицата, како австралијански, канадски и белизејски долари, исто ќе се ажурираат со новиот монарх, но процесот би можел да трае долго бидејќи „многу е полесно да се наметне нов дизајн во земјите од каде што потекнува монархот, отколку во другите земји“, се наведува на интернет страницата на Coin Expert.

Канадската банка соопшти дека нејзината моментална банкнота од 20 долари е дизајнирана од потопорен материјал за да биде во циркулција со години. „Не постои законска обврска за промена на дизајнот во одреден период по промена на монарх“, рекоа од Централната банка на Канада. Генерално, кога за канадските пари се одбира нов портрет, процесот почнува со изработка на нов дизајн, а новата банкнота е подготвена за издавање дури неколку години подоцна, велат од банката.

Од Централната банка на Нов Зеланд рекоа дека ќе ги издадат своите залихи на кованици со приказ на ликот на кралицата пред да излезат новите со ликот на кралот. „Кралицата, исто така, е прикажана и на банкнотата од 20 долари, која ретко се изработува и не постои план за уништување на залихите или за скратување на векот на постоечките банкноти само затоа што ја прикажуваат кралицата“, изјавија од банката.

„Ќе поминат неколку години пред да мора да воведеме кованици со ликот од кралот Чарлс Трети и уште повеќе додека се потрошат залихите од банкнотите од 20 долари со ликот на кралицата“, додаваат од Централната банка на Нов Зеланд.

Валутите на кралицата

Ликот на кралицата Елизабета Втора прв пат се појавува на банкнота уште додека таа била принцеза. Во 1935 година, како дел од новата серија банкноти, се појави канадската банкнота од 20 долари, која ја прикажа осумгодишната принцеза Елизабета, чиј дедо кралот Џорџ Петти тогаш беше монарх.

Канадската банкнота од 20 долари е ажурирана со нов портрет од кралицата во 1954 година, околу една година по нејзиното крунисување, а нејзиниот портрет почна да се појавува и на други валути ширум светот.

На британските банкноти не се прикажуваше човечки лик се до 1960 година, седум години по нејзиното крунисување. Тогаш Централната банка на Англија дозволи да се користи нејзиниот лик на хартиените пари, почнувајќи од банкнотите од 1 фунта, иако официјалната слика е критикувана како престрога и нереална.

Кралицата Елизабета Втора стана прв монарх прикажан на британските хартиени пари. Од друга страна, британските монети повеќе од 1.000 години прикажуваат кралеви и кралици.

Валутите ширум светот

Кралицата Елизабета Втора во својот живот се појавила на најмалку 33 различни валути, повеќе од кој било друг монарх, постигнување што е забележано во Гинисовата книга на рекорди.

Нејзиниот лик и натаму се наоѓа на парите на државите каде е омилена нејзината фигура, како Канада и тие држави кои на знамето имаат мотиви од британското знаме, како Австралија и Нов Зеланд.

Таа се наоѓа и на банкнотите и монетите, што ги издава Централната банка на Источни Кариби, монетарната власт на многу мали нации, кои ги вклучуваат Антигва и Барбуда, Доминиканската Република, Гренада, Монсерат, Сент Китс и Невис, Света Луција и Свети Винсент и Гренадини.

Другите држави одамна престанаа да го ставаат нејзиниот лик на своите валути. Откако Јамајка стекна независност од Британија во 1962 година, тамошната централна банка ја замени кралицата на хартиените валути со портрет од национален херој.

Банкнотите на Сејшелите сега прикажуваат локални диви животни наместо кралицата. Бермуди изврши слична реконструкција, иако кралицата ја задржа со помало место на нивните банкноти. Исто и Тринидад и Тобаго направија промени откако стана република.