Вработените во Водостопанство во државна сопственост Скопје, заклучно со денеска ги добија трите заостанати плати.
„Активностите на АГРО Синдикатот и Сојузот на синдикатите на Македонија дадоа конкретни резултати и во петокот на вработените во АД Водостопанство на РСМ во државна сопственост – Скопје им беше исплатена една од трите заостанатите плати , а во текот на денешниот ден им се исплатени уште две заостанати плати“, се наведува во соопштението од ССМ.
На исплатата, потсетува ССМ, претходеше и подготовката на штрајк во претпријатието по завршување на сите законски рокови кои истекоа минатата недела за почнување на штрајкот и кој ќе се случеше доколку раководството и Владата не ја разбереа јасната заедничка порака на работниците и ако не ги исплатеа заостанатите плати на вработените.
За надминување на тешката состојба во ова државно претпријатие пред еден месец Министерствто за земјоделство одобри 200 милиони денари откако работници излегоа на протест. Паралелно, Министертсвто тогаш најави дека работи и на нов модел за преструктуирање на претпријатието, кој треба да ја подобри и зголеми ефикасноста на вработените.
„Во интерес на јавноста сакаме да напоменеме и за околноста дека АД Водостопанство е посебен орган кој работи самостојно со сопствен буџет и Министерството за земјоделство нема никаква законска можност за распределба или управување со нивните средства, особено за платите кон вработените“соопшти тогаш Министерството.
Не се само платите за вработените проблем за АД Водостопанство. Имено, минатиот месец на неколку подружници на акцинерското друштво им беше исклучена струјата заради неплатени сметки, а закана за исклучување имало и за главната дирекција на АД Водостопанство. Тогаш Блумберг Адриа пишуваше дека во последен момент пред исклучувањето, се обезбедиле пари за да се плати долгот. Долговите за струја се само една голема ставка од сите долгови на ова државно претпријатие.
Последните податоци за долговите кои се ставени на интернет страницата се заклучно со јуни лани кога обврските на ова државно претпијатие изнесуваат 303 милиони денари од кои 51 милион денари се недоспеани обврски, а остатокот од 252 милиони денари се доспеани. Тогаш најголем бил долгот кон ЕВН, за други обврски но и за ДДВ и за плати.
.webp){kind=icon}
