Македонската економија идната година ќе порасне за 2,9 отсто. Оваа проекција на Владата е поставена во предлог-буџетот за идната година и е пониска од претходните прогнози за раст на економијата од 4,6 отсто за 2023 година. Инфлацијата, која годинава е двоцифрена, се планира идната година да остане на високо ниво и да изнесува 7,1 отсто.
Министерот за финансии Фатмир Бесими, кој денеска го претстави буџетот за идната година, рече дека ова е трета година едноподруго како Владата создава кризен буџет.
„Буџетот за 2023 година има три цели. Првата цел е да се соочиме и справиме со глобалната економска криза. Втората цел е да се одржи растот на економијата и да се остане на патот на фискалната консолидација преку намалување на дефицитот. Третата цел е државата редовно да ги сервисира обврските“, рече Бесими.
Приходната страна на буџетот ќе изнесува близу 4,6 милијарди евра. Таа ќе се полни и со помош на даночната реформа што ќе стартува од Нова година, но за ова прашање министерот денеска не сакаше да открива детали. Расходната страна е проектирана на близу 5,3 милијарди евра.
Влада на РСМ
Дефицитот е проектиран на околу 700 милиони евра, или 4,6 отсто од БДП. Трите најголеми ставки што треба да се финансираат се: 250 милиони евра за справување со енергетската криза, 220 милиони евра за отплата на камати за стари долгови и уште 200 милиони евра за изградба на Коридорот 8. Освен овие ставки, идната година по основа на стари долгови државата треба да плати вкупно 800 милиони евра. Или, како што вели министерот, за финансирање на буџетот ќе бидат потребни околу 1,5 милијарда евра.
Буџетот ќе се финансира преку ПЛЛ-аранжманот со ММФ, од кој на трезорската сметка во НБРМ ќе легнат 1,1 милијарда евра, што ќе ги зголеми и девизните резерви, а преку специјални права на влечење, пак, до мај ќе легнат уште 170 милиони. Околу 80 милиони евра ќе бидат грант од Европската комисија.
„За државата останува опцијата за издавање еврообврзница кога ќе бидат поповолни условите на пазарот. Тоа не може да се споредува со ланските услови, но ќе се следи состојбата. За првпат се предвидува издавање зелена обврзница, како и развојна обврзница, преку која граѓаните во земјава и дијаспората ќе можат да инвестираат во државата. Во наредниот период ова ќе стане системско решение“, вели Бесими.
За капитални расходи за 2023 година се планирани 795 милиони евра, што е за 52,3 отсто повеќе од планот за оваа година. Според Бесими, оваа ставка обезбедува раст, затоа што е поголема од дефицитот.
До 2027 година, според прогнозите на власта, дефицитот ќе се спушти под три отсто. До тој период е предвидено растот да надмине пет отсто, а на 60 отсто од БДП, во согласност со меѓународните стандарди, треба да падне и надворешниот долг.
.webp){kind=icon}
Во моментов нема коментари за веста. Биди прв да коментира...